ISRAELA masha ni Egutu mung kaw na pru wa ai hpang, shata lahkawng daram hta, Horab ngu ai Sina bum de du wa ma ai. Ndai shara gaw wan grung ai singwum kaw na, Mawshe hte Yehowa aga shaga ai shara re. Masha ni gaw dai shara hta dap dabang de nna wa hkring nga ma ai.

Masha ni bum lagaw kaw la nga nna, Mawshe gaw bum de lung wa ai. Bum ntsa e, Yehowa gaw Mawshe hpe tsun ai. Israela masha ni shi a ga madat na hte, shi a lak san amyu shatai mayu ai da. Mawshe bum de na yu wa ai shaloi, Yehowa tsun ai ga, masha ni hpe, bai wa tsun dan ai. Masha ni mung Karai kasang a amyu masha tai mayu ma ai majaw, Yehowa a ga hpe madat na ga ai law, nga nna tsun ma ai.

Yehowa mung lak lai ai amu langai mi hpe galaw dan ai. Bum ntsa e, wan hkut pru wa hkra galaw dan ai. Bai nna mung ngoi wa hkra galaw dan ai. Masha ni hpe mung: ‘Ngai gaw nanhte hpe Egutu mung kaw nna shaga wa ai, nanhte a Karai Kasang Yehowa rai nga nngai,’ nga nna tsun ai. ‘Ngai hta kaga karai shaje hpe hkum naw mu,’ nga ai.

Jep ai tara jahku hpe mung bai kahtap jaw ai. Masha ni grai hkrit ma ai. Shanhte gaw: ‘Anhte hpe nang she ga shaga u; Karai Kasang anhte hpe ga shaga jang, anhte si na hpe hkrit ga ai,’ nga nna Mawshe hpe tsun ma ai.

Dai hpang e, Yehowa gaw Mawshe hpe tsun ai: ‘Bum ntsa de lung wa nna, ngai kaw sa wa rit. Masha ni hkan shatup na matu, ngai ra sharawng ai, jep ai tara ni hpe ka da ai lungpa, lahkawng ngai nang hpe jaw na de ai,’ nga nna tsun ai. Dai majaw Mawshe gaw kalang bai bum de lung wa ai. Nthoi 40 ya 40 na bum ntsa e wa nga mat ai.

Karai Kasang gaw shi a amyu masha ni a matu, jep ai tara law law shapraw ya ai. Mawshe gaw dai tara ni hpe ka matsing ai. Lungpa lahkawng mung Mawshe hpe jaw ai. Dai lungpa hta masha yawng hpe shi hkang da ai jep ai tara 10 hpe, Karai Kasang shi nan ka da ai. Dai hpe Jep ai Tara Kanu Shi nga ma ai.

Jep ai tara Shi gaw, ahkyak ai tara ni re. Iraela masha ni hpe jaw ai, kaga tara ni mung ahkyak ai. Jep ai tara langai mi gaw: ‘Na a Karai Kasang Yehowa hpe, na a myit masin mahkra hte, na a n-gun lagaw mahkra hte, na a myit kraw lawang mahkra hte, na a myit mang mahkra hte, tsaw ra nga u,’ nga ai. Bai nna langai mi gaw: ‘na a htingbu wa hpe na a hkum hte maren tsaw ra nga u’ nga nna tsun da ai. Karai Kasang a kasha Yesu hkristu gaw, Yehowa shi a amyu Israela masha ni hpe jaw ai tara ni kaw na, ndai tara lahkawng gaw kaba htum ai tara re, nga ai. Hpang e, Karai Kasang a kasha hte, shi a sharin shaga ai lam law law anhte mu lu na re.