МЫСЫРЫМ къызэрикІыжрэ мазитІ хуэдиз дэкІа иужь, израиль лъэпкъыр Синай бгым деж къокІуэ. НэгъуэщІу а бгым иджыри ХоривкІэ йоджэ. Ар мафІэ зыщІэна чыцэм къыхэпсэлъыкІыу Иеговэ Мусэ къыщепсэлъа щІыпІэращ. Мыбдеж цІыхухэм шэтыр щагъэуври зэман гуэркІэ щопсэу.

Мусэ бгым докІуей, цІыхухэр и лъабжьэм деж къыщегъанэри. Бгыщхьэм Иеговэ Мусэ къыщыжреІэ израиль лъэпкъыр едэІуэну, и лъэпкъ хэха хъуну зэрыхуейр. Бгым къехыжа нэужь, Иеговэ жиІахэр псори Мусэ цІыхухэм яжреІэж. Израиль лъэпкъри хуейт Иеговэ и лъэпкъ хэха хъунуи псалъэ ят абы едэІуэну.

ИтІанэ Иеговэ гъэщІэгъуэн гуэр къегъэхъу. Абы бгыщхьэм Іугъуэ къыкІуэцІрегъэхури уафэр егъэхъуэпскІ. Абы иужькІэ цІыхухэм закъыхуегъазэри жеІэ: «Сэ сы-Иеговэщ, Мысырым фыкъизышыжа Алыхьыращ. Сэр фІэкІа нэгъуэщІ тхьэхэр вгъэлъапІэ хъунукъым», — унафэ яхуещІ абыхэм.

А унафэм нэмыщІ Алыхьым израиль цІыхухэм иджыри унафибгъу е законибгъу къарет. ЦІыхухэр шынэм зэщІищтауэ Мусэ йолъэІу: «КхъыІэ, уэ къыдэпсалъэ. Алыхьыр къыщыдэпсалъэкІэ дылІэнкІэ дошынэ»,— жаІэри.

Зэман дэкІа иужь, Иеговэ Мусэ жреІэ: «КъыдэкІуейт си деж бгым, законхэр зытестха мывэ пІащІитІыр уэстынущи. Абы итхэр си лъэпкъым ирырагъэзащІэ». Абы щхьэкІэ Мусэ бгым докІуейжри махуэ 40-рэ жэщ 40-кІэ къот.

Алыхьым Мусэ закон куэд кърет. Мусэ ахэр псори етхыр. Иджыри Алыхьым Мусэ кърет мывэ пІащІитІыр. ИпэІуэкІэ цІыху псоми къахуищІауэ щыта законипщІыр езы Алыхьым абы иритхауэ итт. А законхэм щхьэкІэ «УнафипщІ» иджыри жаІэ.

А УнафипщІыр мыхьэнэшхуэ зиІэ законхэщ. Ауэ израиль цІыхухэм Алыхьым ярита адрей унафэхэри абыхэм я мыхьэнэкІэ къызэрыкІэрыху щыІэкъым. Абыхэм щыщ зым мыращ жиІэр: «Уэ уи Алыхь Иеговэ фІыуэ плъэгъун хуейщ уигу псомкІи, зэхэщІыкІыныгъэ псомкІи уи псэ псомкІи, уи къару псомкІи». Адрей унафэри мыращ: «Уи щхьэр фІыуэ зэрыплъагъум хуэдэу, уи гъунэгъури фІыуэ плъэгъун хуейщ». Алыхьым и къуэ Хьисэ жиІащ израилым къарита мы унафитІыр псом нэхърэ нэхъыщхьэу. ИужькІэ дэ къэтщІэнущ Алыхьым и Къуэмрэ абы зыхуригъэджахэмрэ теухуауэ нэхъыбэ.