AK WIIBʼ po relikebʼ laj Israel saʼ li tenamit Egipto naq keʼwulak saʼ li tzuul Sinai malaj Horeb. Saʼ li tzuul aʼin li Jehobʼa kiraatina chaq laj Moises. Arin keʼkanaak ebʼ laj Israel chiru naabʼal kutan.

Naq laj Moises kitaqeʼk saʼ li tzuul, ebʼ laj Israel keʼkanaak taqʼa chi roybʼeeninkil. Ut li Jehobʼa kixye re laj Moises naq traj naq ebʼ laj Israel teʼabʼinq chiru ut teʼwanq choʼq xtenamit. Naq laj Moises kikubʼeek, kixchʼolobʼ chiruhebʼ laj Israel li kixye chaq li Jehobʼa. Chixjunilebʼ keʼxye naq teʼabʼinq chiru li Jehobʼa xbʼaan naq nekeʼraj wank choʼq xtenamit.

Anaqwan, ma nakaanaw kʼaru kixbʼaanu li Jehobʼa? Kirisi chaq li sibʼ saʼ xbʼeen li tzuul ut kireekʼasi chaq li kaaq. Chirix chik aʼan kiʼaatinak rikʼin li tenamit ut kixye rehebʼ: ‹Laaʼin li Jehobʼa li kiʼisink chaq aawe Egipto›. Tojaʼ naq kixkʼe li chaqʼrabʼ aʼin rehebʼ: ‹Maaloqʼoni jalanebʼ chik yos chiwu laaʼin›.

Li Yos kixkʼe bʼeleebʼ chik li chaqʼrabʼ rehebʼ laj Israel. Li tenamit yook xxiw, joʼkan naq keʼxye re laj Moises: ‹Aatinan laaʼat qikʼin, xbʼaan naq naru tookamq wi li Yos t-aatinaq qikʼin›.

Chirix chik aʼan li Jehobʼa kixye re laj Moises: ‹Taaqenk chaq saʼ li tzuul. Tinkʼe aawe li wiibʼ chi perpookil pek, bʼarwiʼ xintzʼiibʼa linchaqʼrabʼ re naq teʼxyuʼami li tenamit›. Joʼkan naq laj Moises kitaqeʼk wiʼ chik saʼ li tzuul ut kiwank chaq aran 40 kutan ut qʼoqyink.

Naabʼal li chaqʼrabʼ kixkʼe li Yos re li xtenamit ut laj Moises kitzʼiibʼank re chixjunil aʼ in. Li wiibʼ chi perpookil pek li kixkʼe li Yos re laj Moises. Aʼan li lajeebʼ chi chaqʼrabʼ kixtzʼiibʼa li Yos.

Li lajeebʼ chi chaqʼrabʼ wank xwankil. Joʼkan ajwiʼ chixjunil li xchaqrabʼ li Yos. Jun rehebʼ li chaqʼrabʼ naxye: ‹Taara li Jehobʼa chi anchal laachʼool, chi anchal laakʼaʼuxl, chi anchal laawanm ut chi anchal laametzʼew›. Jun chik li chaqʼrabʼ naxye: ‹Chaara laawas aawiitzʼin joʼ naq nakaara aawibʼ laaʼat›. Li Jesus kixye naq aʼin li wiibʼ xnimal ru li chaqʼrabʼ kixkʼe li Yos re li xtenamit. Moqon chik tootzoloq chirix li Jesus ut chanru kikʼutuk chaq.