TA MĨERI ĩrĩ kuuma moima Misiri-rĩ, Aisiraeli magĩkinya Kĩrĩma-inĩ kĩa Sinai, o kĩu gĩetagwo na rĩĩtwa rĩngĩ Horebu. Handũ haha no harĩa Jehova aaririe na Musa kũgerera kĩhinga-inĩ kĩrĩa gĩakanaga. Andũ maambire hema hau na magĩikara ihinda ho.

Musa aambatire kĩrĩma-inĩ, andũ metereire hau thĩ. Kũu kĩrĩma igũrũ-rĩ, Jehova akĩĩra Musa atĩ ekwenda Aisiraeli Mamwathĩkĩre na matuĩke andũ Ake aamũre. Hĩndĩ ĩrĩa Musa aikũrũkire-rĩ, akĩĩra Aisiraeli ũrĩa Jehova oigĩte. Andũ makiuga nĩ maagwathĩkĩra Jehova, tondũ nĩ meendaga gũtuĩka andũ ake.

Rĩu Jehova agĩĩka kaũndũ ka magegania. Agĩtũma kĩrĩma igũrũ kiume ndogo, na agĩtũma kũgĩe na ngwa nene. Agĩcoka akĩaria na andũ: ‘Niĩ nĩ niĩ Jehova Ngai waku ũrĩa wakũrutire bũrũri wa Misiri.’ Agĩgĩcoka akĩmaatha: ‘Ndũkanagĩe na ngai ĩngĩ tiga niĩ.’

Ngai akĩhe Aisiraeli maathani mangĩ kenda, kana mawatho. Andũ magĩtigĩra mũno. Magĩkĩĩra Musa atĩrĩ: ‘Aragia na ithuĩ arĩ wee, no Ngai nĩagĩtige kwaria na ithuĩ tũtigakue.’

Thutha ũcio Jehova akĩĩra Musa atĩrĩ: ‘Ambata ũũke harĩ niĩ kĩrĩma-inĩ. Na niĩ ngũnengere ihengere igĩrĩ cia mahiga iria nyandĩkĩte maathani marĩa ngwenda andũ mamahingie.’ Ningĩ o rĩngĩ Musa akĩambata kĩrĩma igũrũ. Agĩikara kũu matukũ 40, mũthenya o na ũtukũ.

Ngai aarĩ na mawatho maingĩ mũno ma andũ ake. Musa nĩamaandĩkire. O na ningĩ Ngai akĩnengera Musa ihengere igĩrĩ cia mahiga. Thĩinĩ wa cio, Ngai we mwene nĩ aandĩkire mawatho 10 marĩa aaririe na andũ othe. Nĩmo meetagwo Maathani Ikũmi.

Maathani macio Ikũmi nĩ mawatho me bata mũno. O ũndũ ũmwe na mawatho mangĩ maingĩ marĩa Ngai aaheire Aisiraeli. Rĩmwe rĩa mawatho macio nĩ: ‘Enda Jehova Ngai waku na ngoro yaku yothe, na muoyo waku wothe, na gwĩciria gwaku guothe, na hinya waku wothe.’ Narĩo rĩa kerĩ rĩhaana o ta rĩu: ‘Enda mũndũ ũrĩa ũngĩ o ta ũrĩa wĩendete wee mwene.’ Jesu Kristo, Mũrũ wa Ngai, oigire atĩ maya nĩmo mawatho marĩa merĩ manene Jehova aaheire andũ ake Aisiraeli. Thutha-inĩ nĩ tũkwĩruta maũndũ maingĩ makoniĩ Mũrũ wa Ngai na ũrutani wake.