BYO papichile bañondo babiji kufuma po bafumijile mu Ijipita, bena Isalela bafikile ku Mutumba wa Sinai, utelwa’mba Holeba. Ku ino mpunzha Yehoba ko ko aambile kwi Mosesa mu kipupu kyatemenenga mujilo. Bantu batebelejile ku ino mpunzha ne kwikalako pacheche.

Bantu byo bapembelejilenga munshi ya mutumba, Mosesa wayile pa mutumba. Byo afikile peulu ya mutumba, Yehoba wamubujile Mosesa amba wakeba bena Isalela kumukokela ne kwikala bantu banji basalululwa. Mosesa byo akunkulukile ku mutumba, waambijile bena Isalela byaambile Yehoba. Kabiji bantu baambile’mba bakamukokelanga Yehoba, mambo bakebele kwikala bantu banji.

Yehoba pano waubile kintu kya kukumya. Walengejile peulu ya mutumba kufutumuka bwishi ne kuba kilulumo kikatampe. Waambijile bantu amba: ‘Amiwa ne Yehoba Lesa wenu, wimufumishe mu Ijipita.’ Kepo akambizhe’mba: ‘Kechi mukapopwelenga balesa bakwabo, ba kubikapo pe amiwa ne.’

Lesa wapele bena Isalela mikambizho nangwa’mba mizhilo ikwabo itanu na ina. Bantu bachiine bingi. Baambijile Mosesa amba: ‘Mwitwambile anweba, bino aye Lesa kechi etwambile ne, twakafwa.’

Palutwe kacheche Yehoba waambijile Mosesa amba: ‘Kanjila wiye kwi amiwa kuno ku mutumba. Nsa kukupa mabwe abiji apapakana po nanemba mizhilo yo bafwainwa kulamanga bantu.’ Kepo Mosesa ayile jibiji ku mutumba. Waikele konka ku mutumba pa moba 40 mute ne bufuku.

Lesa wajinga na mizhilo yavula bingi ya kupa bantu banji. Mosesa wanembele ino mizhilo. Lesa wapele Mosesa mabwe abiji apapakana. Pa ano mabwe, Lesa po po anembele mizhilo jikumi yo aambile ku bantu bonse. Ino mizhilo itelwa’mba Mikambizho Jikumi.

Mikambizho Jikumi ke mizhilo yanema bingi. Ne mizhilo yavula yo apaine Lesa ku bena Isalela nayo yanemene bingi. Muzhilo umo wajinga wa kuba’mba: ‘Ukamutemwe Nkambo Lesa wobe na muchima wobe yense, ne na maana wobe onse, ne na mweo wobe yense, ne na bulume bobe bonse.’ Mukwabo ke wa kuba’mba: ‘Ukatemwe mukwenu pamo byonka byo witemwa obe mwine.’ Mwana Lesa, aye Yesu Kilishitu waambile’mba ino yo mizhilo ikatampe ibiji yo apaine Yehoba ku bena Isalela. Kulutwe tukafunda bintu byavula bingi byaamba pa Mwana Lesa ne pa mafunjisho anji.