Chihande 35

Yehova Mwavahana Jishimbi Jenyi

KAFWE tukweji vavali hakufuma muEjipitu, vaIsalele washa kuPili Shinai, chipwe ngwavo Holeve. Oku kwakuze Yehova ahanjikile naMose muchiputa chakakahya. Vatu vanatungu nakushimbulako chindende.

Omu vatu vanakutatamina kwishi lyapili, Mose hikunyina helu. Helu lyapili, Yehova mwamulweza Mose ngwenyi, Anakusaka vaIsalele vononoke kuli Ikiye nakupwa vatu Jenyi vakulipwila. Mose mwasuluka nakulweza vaIsalele mwanahanjika Yehova. Vatu navetava kumwononokela Yehova, hakusaka vapwenga vatu jenyi.

Yehova mwalinga nawa chuma chakukomwesa. Alingishile mumutwe wapili mufwinde wishi, namikalateta. Himwamba kuvatu ngwenyi: ‘Yami Yehova Kalunga kenu uze amilowele muEjipitu.’ Mwavahana lushimbi ngwenyi: ‘Kanda namukalifukula kutulunga vekako.’

Kalunga mwahana jino vaIsalele jishimbi jikwavo jitanu najiwana. Vatu vachikimine. Valwezele Mose ngwavo: ‘Hanjikove kuli etu, tuli nawoma ngwetu nge Kalunga mwahanjika kulyetu kaha natufwa.’

Kaha Yehova himwalweza Mose ngwenyi: ‘Kanduka kuno kuli ami kwilu lyapili. Nangukuhana malolwa avali haze ngwasoneka jishimbi ngunasake vatu vakavangize.’ Mose mwakanduka cheka kupili. Mwatwama jino kuze makumbi 40, musana naufuku.

Kalunga ali najishimbi jajivulu jakuhana vatu jenyi. Mose himwajisoneka. Kalunga mwamuhana cheka malolwa avali. Aha hakiko Kalunga ivene nasoneka jishimbi 10 jize alwezele vatu vosena. Jishimbi kana vajivuluka ngwavo Jishimbi Likumi.

Jishimbi Likumi japwa jajilemu. Najishimbi jikwavo jize Kalunga ahanyine vaIsalele japwa jajilemu. Lushimbi lumwe halyeji jishimbi lwavuluka nge: ‘Muzangenunga Yehova Kalunga kenu namichima yenu yosena, namanganenu osena, namyono yenu yosena nangolo jenu josena.’ Lukwavo ngwavo: ‘Zangenunga vakwenu nganomu mwalizangilenu vavene.’ MwanaKalunga, Yesu Kulishitu, ambile nge eji jishimbi jivali ahanyine Yehova kuvatu jenyi vaIsalele jikiko jajinene. Kanda numba tulinangule vyuma vyavivulu vyaMwanaKalunga navyuma alongeselenga.

Kulovoka 19:1-25; 20:1-21; 24:12-18; 31:18; Lushimbi lwamuchivali 6:4-6; VyavaLevi 19:18; Mateu 22:36-40.