NI̱YA̱ʼA u̱vi̱ yo̱o̱ ña̱ ke̱e na̱ ñuu Israel ña̱ ñuu Egipto, tasaá ni̱xa̱a̱na yuku̱ ña̱ naní Sinaí á Horeb. Yóʼo kúú nu̱ú ni̱ka̱ʼa̱n Jehová xíʼin ta̱ Moisés nu̱ú níndichi iin yitu̱n loʼo xíxi̱. Yóʼo ni̱xi̱yona loʼo tiempo.

Na̱ yiví ndátuna, ta ta̱ Moisés ku̱a̱ʼa̱nra chí yuku̱. Ta kán ni̱ka̱ʼa̱n Jehová xíʼinra ña̱ kúni̱ra ná kuniso̱ʼo na̱ ñuu Israel ña̱ káʼa̱nra, tasaá xa̱a̱na koona na̱ ñuura. Soo tá ndi̱kó ta̱ Moisés ni̱ka̱ʼa̱nra xíʼinna ndiʼi ña̱ ni̱ka̱ʼa̱n Jehová xíʼinra. Ta ni̱ka̱ʼa̱nna ña̱ kuniso̱ʼona ña̱ káʼa̱n Jehová, saáchi kúni̱na koona na̱ ñuura.

Íyo iin ña̱ ke̱ʼé Jehová. Ta̱vára yi̱ʼma̱ xi̱ní yuku̱ Sinaí ta ki̱xaʼá ndáʼyi̱ taxa xi̱ní yuku̱ yóʼo. Ta káchitura xíʼinna: ʼYi̱ʼi̱ kúú Jehová ta̱ ta̱vá ndóʼó ña̱ ñuu Egiptoʼ. Ta xa̱ʼndara chiñu yóʼo nu̱úna: ʼIinlá yi̱ʼi̱ kúú ta̱ ndasakáʼnundó kǒo ndasakáʼnundó inka ndióxi̱ʼ.

Jehová ta̱xira inka i̱i̱n leyra ndaʼa̱ na̱ ñuu Israel. Ta na̱yóʼo ni̱yi̱ʼvíkavína. Ta káchina xíʼin ta̱ Moisés: ʼVa̱ʼaka miíún ka̱ʼa̱n xíʼinndi̱ chi yíʼvindi̱ kuvindi̱ tá ná ka̱ʼa̱n Ndióxi̱ xíʼinndi̱ʼ.

Tándi̱ʼi, Jehová ni̱ka̱ʼa̱nra xíʼin ta̱ Moisés: ʼXaún chí nu̱ú yuku̱ yóʼo. Yóʼo taxii̱ u̱vi̱ yu̱u̱ ndaʼún nu̱ú ka̱ʼyíi̱ ley ña̱ kúni̱i̱ taxiún ndaʼa̱ na̱ ñui̱ʼ. Ña̱kán ni̱xa̱ʼa̱n tuku ta̱ Moisés yuku̱ yóʼo. Ta 40 ki̱vi̱ xíʼin 40 ñu̱ú xi̱ndika̱a̱ra kán.

Ndióxi̱ ku̱a̱ʼání ley ta̱xira ndaʼa̱ na̱ ñuura. Ta̱ Moisés ka̱ʼyí ña̱yóʼo. Ndióxi̱ ta̱xira u̱vi̱ yu̱u̱ ndaʼa̱ra. Ta nu̱ú yu̱u̱ yóʼo, mií Ndióxi̱ ka̱ʼyí 10 ley ña̱ káʼa̱nra xíʼin na̱ ñuura. Ña̱yóʼo naníña U̱xu̱ Ley Ndióxi̱.

U̱xu̱ saá ña̱ Ley yóʼo ndáyáʼviníña. Ta ku̱a̱ʼáka kúú ley ta̱xi Ndióxi̱ ndaʼa̱na, tasaá ndáyáʼvitu ña̱yóʼova. Ña̱yóʼo kúú iinña: ʼXíniñúʼu kuʼvi̱-iniún kuniún Jehová xíʼin ndiʼi níma̱ún, xíʼin ndiʼi xi̱níún xíʼin ndiʼi ña̱ tákún xíʼin ndiʼi ndeúnʼ. Ta ña̱yóʼo kúú inkaña: ʼXíniñúʼu kuʼvi̱-iniún kuniún inka na̱ yiví nda̱a̱ tá kúʼvi̱-iniún xíniún miíúnʼ. Ta̱ Jesús ni̱ka̱ʼa̱nra u̱vi̱ saá ley yóʼo kúú ña̱ ndáyáʼvika ña̱ ta̱xi Ndióxi̱ ndaʼa̱ na̱ ñuura. Chí nu̱únínuka sakuaʼakayó xa̱ʼa ta̱ Jesús xíʼin xa̱ʼa ña̱ sa̱náʼa̱ra.