Tanojnots 35

Jiova kitemakak itanauatiluan

KEMEJ ome metsti satepan keman israelitas kiskej Egipto, ajsikej itech tepet Sinaí, tein no motokaytiaya Horeb. Ompa kampa Dios tajtojka iuan Moisés itech se uitskuoujtaktsoj tein xotatoya. Israelitas ompa motsakuilijkej uan mokaujkej se ome eyi tonalmej.

Keman Moisés tejkok itech tepet, israelitas mochixkej tepetsintaj. Ompa Jiova kiiluij Moisés ika Yej kinekia maj israelitas kitakamatinij uan maj mochiuanij Iaxkauan. Keman Moisés temok, kiniluij israelitas tein Jiova kijtojka. Uan yejuan kijtojkej ika kitakamatiskiaj, porin kinekiaj mochiuaskej iaxkauan Jiova.

Jiova kichiuak tein amo keman kichiujtoya. Kichiuak maj tapopokani tepekuako, uan maj chikauak tatitikuini. No kininojnotsak israelitas uan kiniluij: ‘Nejua ni Jiova namoDios tein namechkixtij Egipto’. Ompa kinimakak nejin tanauatil: ‘Amo xikiniueyichiuakan okseki tiotsitsin, ta sayoj nejua’.

Dios kinimakak israelitas okseki chiknaui tanauatilmej. Israelitas motelmoujtiayaj, yejika kiiluijkej Moisés: ‘Tejua xitechnojnotsa, porin tikmouiliaj timikiskej komo Jiova technojnotsa’.

Satepan, Jiova kiiluij Moisés: ‘Xitejko tepekuako. Nejua nimitsmakati ome patauak tet kampa nikijkuiloj tanauatilmej tein nikneki maj kitakamatikan israelitas’. Yejika Moisés oksepa tejkok itech tepet. Ome poual tonal uan ome poual youal yetoya ompa.

Dios kinpialiaya miak, miak tanauatilmej israelitas. Nejin tanauatilmej Moisés kinijkuiloj. Dios no kimakak Moisés ome patauak tet, kampa Jiova kijkuiloj majtakti tanauatilmej tein kiniluijka israelitas. Motokaytiaj Majtakti Tanauatilmej.

Nejin Majtakti Tanauatilmej yejua tein motelneki. Uan amo sayoj yejua, ta no okseki miak tanauatilmej tein Dios kinimakak israelitas. Semej, yejua nejin: ‘Xiktasojta Jiova moDios ika nochi moyolo, ika nochi motanemililis, ika nochi motanejnekilis uan ika nochi mochikaualis’. Uan okse yejua nejin: ‘Xiktasojta mokniuj ijkon kemej tejua timotasojta’. IKoneuj Dios, Jesucristo, kijtoj ika yejua nejin ome tanauatilmej tayekantokej tein Dios kinimakak israelitas. Satepan timomachtiskej tein kichiuak iKoneuj Dios uan tein tamachtij. Éxodo 19:1-25; 20:1-21; 24:12-18; 31:18;

Deuteronomio 6:4-6; Levítico 19:18; Mateo 22:36-40.