JUN kebʼ oxibʼ ikʼ che e elenäq chi bʼi pa Egipto, ri täq israelitas xeʼopan cho raqan ri juyubʼ (jïbʼ) ubʼiʼ Sinaí, xuqujeʼ kbʼix ri bʼiʼaj Horeb che. Chilaʼ xchʼaw ojer ri Ajawaxel che Moisés chupam ri alaj kʼix cheʼ che umajom qʼaqʼ. Chilaʼ xeʼuxlan (xiʼuxin) wi; naj xkebʼan chilaʼ.

Ri winaq xekanaj kan ikim, tekʼuriʼ ri Moisés xel bʼi puwiʼ ri juyubʼ. Ri Jehová xubʼij che Moisés che are kraj che ri israelitas keniman che xuqujeʼ kkebʼan ri nimalaj Utinamit. Chiʼ ri Moisés xtzalij loq, xubʼij chike ri israelitas ronojel su ubʼim lo Jehová che. Ri winaq xkebʼij che kkenimaj na rutzij ri Jehová, rumal che kkaj kkebʼan ri nimalaj utinamit.

Jehová xubʼan wariʼ: xubʼano che xel sibʼ puwiʼ ri juyubʼ, xuqujeʼ kitinlaj ri kaypaʼt (truenos). Tekʼuriʼ xok che uchʼabʼexik ri tinamit, jewaʼ xubʼij chike: ‹Are in Jehová ri aDios che xatresaj lo pa Egipto›. Xuqujeʼ xubʼij wariʼ chike: ‹Xa manimarisaj kiqʼij nikʼaj chik täq dioses che nuwäch in›.

Ri Ajawaxel xuya chi bʼelejebʼ taqonik chike. Rukʼ wariʼ sibʼalaj xkexibʼij kibʼ. Jewaʼ riʼ xkebʼij che Moisés: ‹Chatchʼaw at qukʼ, rumal che we are ri Ajawaxel kojuchʼabʼej, kojkamik›.

Rumal waʼ Jehová xubʼij wariʼ che Moisés: ‹Chatel lo at waral puwiʼ ri juyubʼ. In kinya na kebʼ tzʼalam uwäch täq abʼaj chawe, intzʼibʼan ri nutaqonik chuwäch xuqujeʼ are waʼ kwaj in che kkenimaj ri nutinamit›. Rumal wariʼ ri Moisés xel chi bʼi jumul chik (o jiyak chik) puwiʼ ri juyubʼ. 40 qʼij xubʼana chilaʼ.

Ri Ajawaxel e kʼo sibʼalaj kʼi täq taqonik rukʼ, rech kuya che rutinamit. Moisés xeʼutzʼibʼaj. Xuqujeʼ ri Ajawaxel xuya ri kebʼ abʼaj tzʼalam uwäch che ri Moisés. Chuwäch wa nikʼaj täq abʼaj, are ri Ajawaxel xutzʼibʼaj ri 10 taqonik che xutaq bʼi chike rutinamit. Kibʼiʼ: ri Lajuj Taqonik (mandamientos).

Nimalaj kipatan ri Lajuj Taqonik. Xuqujeʼ ri Ajawaxel xuya e kʼi nikʼaj chik täq taqonik chike ri israelitas xuqujeʼ sibʼalaj nim kipatan. Are waʼ, jun chike: ‹Chaloqʼej (chaloʼoj) Jehová ri aDios rukʼ ronojel akʼaslemal, rukʼ ronojel awetaʼmbʼäl, rukʼ ronojel akʼuʼx xuqujeʼ rukʼ ronojel achoqʼabʼ›. Ri jun chik are wajun: ‹Rajawaxik keʼaloqʼej ronojel ri täq nikʼaj chik winaq, junam rukʼ uloqʼexik awibʼ at›. Rukʼojol ri Ajawaxel, ubʼiʼ Jesús, xubʼij che are wariʼ ri kebʼ nimalaj täq taqonik xuya ri Ajawaxel che rutinamit Israel. Kʼateʼ kqetaʼmaj na e kʼi täq bʼantajik chirij Rukʼojol ri Ajawaxel xuqujeʼ chirij su täq xukʼut kanoq.