EGIPTO nacionmanta lloqsimusqankumanta iskay killa qepataña Israel runakunaqa Sinai orqoman chayarurqaku, chay orqotaqa Horeb nispapas suticharqaku. Chaypim Diosqa Moisesman rupachkaq chapramanta rimarqa. Chaypitaqmi Israel runakunaqa karpankuta sayachirqaku; hinaspa wata chaychaytam qepakurqaku.

Hinaptinmi Moisesqa orqoman seqarqa, runakunañataq chayllapi qepakurqaku. Orqopim Moisesman Jehová Diosqa nirqa, Israel runakuna Payta kasukuspanku sapaqchasqa Llaqtan kanankupaq. Moisesqa orqomanta uraykamuspan runakunaman Jehová Diospa nisqanta willarqa. Runakunañataqmi Jehová Diospa llaqtan kayta munaspanku kasukunankupaq nirqaku.

Hinaptinmi admirakunapaq kaqtam Jehová Diosqa rurarqa. Orqota qosnirirachispam rayokunata tunrururuchirqa. Runakunamanpas nirqataqmi: ‘Ñoqam Jehová Diosqa kani, Egipto nacionmanta horqomurqaykichik.’ Hinaspanmi kaynata kamachirqa: ‘Amam huk dioskunaqa kapusunkichikchu’ nispa.

Isqon kamachikuykunatapas Israel runakunaman qorqa. Chaymi runakunaqa mancharikuspanku Moisesta nirqaku: ‘Qamyá rimapayawaykuqa, Dios rimapayawaptinkuqa yanqam wañuruymanku’ nispa.

Chaymantañataq Jehová Diosqa Moisesta nirqa: ‘Orqoman seqamuy chaypim tabla rumikunapi qellqasqay kamachikuytam qosqayki runakunaman yachachinaykipaq’ nispa. Hinaptinmi Moisesqa orqoman huktawan seqaspa 40 punchaw tutantin chaypi qepakurqa.

Diosqa achka kamachiykuykunataraqmi llaqtanman qonan karqa. Chaytamá Moisesqa qellqarqa. Chaymantapas Diosqa iskay tabla rumikunata Moisesman qorqa. Chaypim Diosqa llaqtanman rimasqanman hina 10 kamachikuyninkunata qellqarqa. Chaytaqa Chunkantin Kamachikuykuna nispam sutichanku.

Chunkantin Kamachikuykunaqa aswan allin kaq kamachikuykunam. Wakin kamachikuykunapas allintaqmi. Huknin kaqpim nin: ‘Jehová Diostam kuyanki tukuy sonqoykiwan, tukuy vidaykiwan hinaspa tukuy kallpaykiwan.’ Hukninñataqmi nin: ‘Kuyay runamasikita kikikita hina’ nispa. Diospa Churin Jesucristoqa nillarqataqmi iskay hatunnin kamachikuykuna kasqanta, chaytam Diosqa llaqtanman qorqa. Chaymantañam yachasunchik Diospa Churinmanta hinaspa yachachisqanmantapas.