MEI te rua marama i muri ake i te akaruke anga ia Aiphiti, kua tae mai to Iseraela ki te Maunga i Sinai, tei kapiki katoaia e ko Horeba. Ko te ngai tikai teia i tuatua ai a Iehova kia Mose na roto i te pu tita ka. Kua puakapa mai te iti tangata i konei e kua noo no tetai taime.

I te iti tangata e tiaki ra i raro, kua aere a Mose ki runga i te maunga. I runga i te take o te maunga, kua akakite a Iehova kia Mose e ka inangaro Aia i to Iseraela kia akarongo Iaia e kia riro mai ei iti tangata akaperepere Nona. I te oki mai anga a Mose ki raro, kua akakite aia ki to Iseraela i ta Iehova i tuatua mai. E kua karanga te tangata e ka akarongo ratou kia Iehova, no te mea kua inangaro ratou kia riro mai ei iti tangata nona.

Kua rave i reira a Iehova i tetai apinga umere tikai. Kua maani aia kia auai te take o te maunga, e kia aruru maata te mangungu. Kua tuatua katoa aia ki te tangata e: ‘Ko au toou Atua ra ko Iehova ko tei arataki mai ia koe mei Aiphiti.’ I reira kua akaue aia e: ‘Auraka rava koe e akamori i tetai atua ke mari ra iaku nei.’

Kua oronga te Atua e iva atu au akauenga me kore au ture ki to Iseraela. Mataku tikai te tangata. Akakite ratou kia Mose e: ‘E tuatua ua mai koe kia matou, no te mea e mataku matou me tuatua mai te Atua kia matou ko te mate aea matou.’

Muri mai kua akakite a Iehova kia Mose e: ‘Aere mai koe ki runga i te maunga kiaku nei. Ka oronga atu au e rua toka paraa taku i tata i te au ture, e taku i inangaro kia akono te iti tangata.’ No reira a Mose i oki akaou ei ki runga i te maunga. Kua noo aia i reira e 40 ra e te po.

E manganui ua atu ta te Atua ture na tona iti tangata. Na Mose i tata teia au ture. Kua oronga katoa te Atua e rua toka paraa kia Mose. Na te Atua uaorai i tata i te au ture e 10 ki runga i te reira, e kua akakite pouroa aia i te reira ki te iti tangata. Kua kapiki ratou i teia e ko te Ture Ngauru.

E au ture puapinga te Ture Ngauru. Pera katoa te au ture ke e manganui ta te Atua i oronga ki to Iseraela. Tetai o teia au ture koia oki: ‘E aroa atu koe i to Atua ko Iehova ma to ngakau katoa, ma to manako katoa, ma to vaerua katoa e to ririnui katoa.’ E tetai mai: ‘E aroa atu koe i toou tangata tupu mei ia koe uaorai.’ Kua karanga te Tamaiti a te Atua ko Iesu Karaiti e, ko teia te nga ture maata roa atu ta Iehova i oronga ki tona iti tangata ko Iseraela. Muri mai e manganui te au apinga ta tatou ka apii no runga i te Tamaiti a te Atua e tana au apiianga.