NGEMUVA kwetinyanga leticishe tibe timbili ema-Israyeli esukile eGibhithe, efika eNtsabeni iSinayi lephindze ibitwe ngekutsi iHorebe. Lena ngulendzawo Jehova lakhuluma kuyo naMosi esihlahleni lesivutsako. Ema-Israyeli efika ahlala lapho kwesikhashana.

Njengoba bantfu bebemile, Mosi wakhuphukela entsabeni. Etulu entsabeni Jehova wamtjela kutsi abefuna ema-Israyeli amlalele kuze abe bantfu bakhe labakhetsekile. Mosi wehla entsabeni wafike watjela bantfu loko Jehova abemtjele kona. Bantfu batsi konkhe lobekushiwo nguJehova bayawukwenta, ngobe bebafuna kuba bantfu bakhe.

Manje Jehova wenta intfo leyetfusako. Wenta kutsi etikwentsaba kube khona lifu kanye nemsindvo lomkhulu wekudvuma. Wakhuluma kubantfu watsi: ‘NginguJehova Nkulunkulu wenu lowanikhipha eGibhithe. Ningakhonti labanye bonkulunkulu ngaphandle kwami.’

Nkulunkulu waniketa ema-Israyeli leminye imiyalo nobe imitsetfo leyimfica. Bantfu betfuka nabeva loku. Bakhuluma kuMosi batsi: ‘Khuluma wena kitsi, ngobe siyesaba kutsi nakukhuluma Nkulunkulu kitsi, sitakufa.’

Jehova wakhuluma naMosi watsi: ‘Yenyuka ukhuphukele kimi entsabeni. Ngitakunika tibhelekece tematje letimbili, letinemiyalo lengiyibhalele kutsi igcinwe bantfu.’ Ngako Mosi waphindze wakhuphukela entsabeni. Wahlala lapho emalanga langu-40 kanye nebusuku lobungu-40.

Nkulunkulu waniketa bantfu imitsetfo leminyenti kakhulu, futsi Mosi wayibhala phasi. Nkulunkulu wabese uniketa Mosi tibhelekece letimbili tematje labebhalele kuto imitsetfo yakhe lengu-10, kuze ayitjele bantfu. Ibitwa ngekutsi ngiMiyalo Lelishumi.

LeMiyalo Lelishumi, ingimitsetfo lebalulekile. Nalena leminye imitsetfo leminyenti Nkulunkulu layiniketa ema-Israyeli, nayo ibalulekile. Lomunye wayo ngulona: ‘Kumelwe utsandze Jehova longuNkulunkulu wakho ngayo yonkhe inhlitiyo yakho, nangawo wonkhe umphefumulo wakho, nangayo yonkhe ingcondvo yakho.’ Wesibili lofanana nawo utsi: ‘Kumelwe utsandze makhelwane wakho njengoba utitsandza wena.’ Jesu Khristu iNdvodzana yaNkulunkulu watsi lena lemibili yimiyalo lemikhulu Jehova layiniketa bantfu bakhe, ema-Israyeli. Ngekuhamba kwesikhatsi, sitawufundza lokunyenti ngeNdvodzana yaNkulunkulu nangaloko leyakufundzisa.