A̱JMA̱ igu̱nʼ nda̱wa̱á rí nigájnun náa Egipto, bi̱ israelitas naguanu náa kúbá Sinaí, ma̱ngaa nagumbiʼyuu Horeb. Gi̱i̱ ninindxu̱u̱ náa rí Dios niʼthúu̱n Moisés asndu náa xtáʼdu̱u̱ iná rí nagájnuu agiuʼ. Gi̱i̱ ni̱ndxu̱u̱ náa naguanún nunuʼ xa̱bu̱ xuajin; naguanún gi̱i̱ asndu índo̱ na̱jkha̱ maʼni mbá tsiguʼ.

Índo̱ rí xa̱bu̱ guáʼthi̱i̱n kawáá, Moisés natsimuu náa kúbá. Ikhí, Jeobá naʼthúu̱n Moisés dí Ikhaa nandoo rí israelitas munimbu̱ún kuyáá ga̱jma̱a̱ maguanu manindxu̱ún Xuajñu bi̱ kiejunʼ. Índo̱ rí Moisés nakajta̱a̱, naʼthúún israelitas rí Jeobá niʼthí. Ga̱jma̱a̱ xa̱bu̱ nuthi rí munimbu̱ún kuyáá Jeobá, numuu rí nandún manindxu̱ún xuajin ndrígóo.

Rí xúgi̱ Jeobá naʼni mbá rí na̱nguá kujmaa kayuʼ. Naʼni rí magajnúu gúní náa inuu kúbá, ga̱jma̱a̱ naʼni rí mundxa̱ʼwa̱ gakhi̱i̱ wéñuʼ bi̱gu̱. Ma̱ngoo naʼthúún xa̱bu̱ xuajin: ‹Ikhúúnʼ ni̱ndxu̱ʼ Jeobá Dios ndrígáʼ bi̱ niríñanʼ náa Egipto›. Ikhú naxnún xtángoo rígi̱: ‹Ragíʼmaa matiamajkún eʼwíínʼ Dios bi̱ raʼkháa ikhúúnʼ›.

Dios naxnún israelitas imbá mijna gu̱wa̱ʼ xtángoo. Xa̱bu̱ xuajin namiñun wéñuʼ. Nutháán Moisés: ‹Aratúxuʼ ikháánʼ, numuu rí namíñuxuʼ rí á mu Dios gáʼtuxu makhañúxu›.

Nda̱wa̱á, Jeobá naʼthúu̱n Moisés: ‹Atsimaaʼ gi̱i̱ náa kúbá. Ikhúúnʼ maxna̱ʼ a̱jma̱ itsí rí wajpa náa niniraʼmáʼ gu̱wa̱ʼ xtángoo rí nandoʼ muyexi̱i̱ xa̱bu̱ xuajin›. Ikhú Moisés natsimuu mbu̱júu̱ náa kúbá. Ikhí naguanúu 40 mbiʼi ga̱jma̱a̱ 40 mbruʼun.

Dios gíʼdoo mbaʼa, ra̱ʼkhá tháán mbaʼa xtángoo rí gíʼdoo maʼnimbo̱o̱ xuajñu. Moisés eʼnirámáʼ. Ma̱ngaa Dios naxnúu Moisés nájma̱ itsí rí wajpa. Rí ikhaa mínaʼ má Dios niʼnirámáʼ 10 xtángoo rí niʼthún má xúgíʼ xuajin. Rí nagumbiʼyuu Gu̱wa̱ʼ Xtángoo.

Rí Gu̱wa̱ʼ Xtángoo gíʼdoo wéñuʼ numuu. Mú xúʼko̱ má ni̱ndxu̱u̱ i̱ʼwáʼ xtángoo rí Dios exnún israelitas. Mbá dí ikhaa ni̱ndxu̱u̱: ‹Gaʼne mba jañi-jayuʼ akianʼ-xtaya Señor Diaʼ, [...], mbá jañi-jayu jumaʼ, jame gajma mba xugui tsiake ri xtaʼda›. Imbo̱o̱ ni̱ndxu̱u̱: ‹Gaʼne akianʼ-xtaya xabo numbagajmaʼ, asndo xoma ri naʼne akianʼ xtayaminaʼ ikan›. A̱ʼdióo Dios, Jesucristo, niʼthí dí rígi̱ ni̱ndxu̱u̱ a̱jma̱ xtángoo rí phú itháan gíʼdoo numuu rí Dios nixnúu xuajñu Israel. Nda̱wa̱á majmañulúʼ itháan ga̱jma̱a̱ numuu A̱ʼdióo Dios ga̱jma̱a̱ rí niʼsngáa.