MAIZUMENUS fulan rua depois ema Izraél sai husi Ejitu, sira toʼo Foho Sinai, neʼebé mós iha naran Horeb. Iha fatin neʼe mak Jeová koʼalia uluk ba Moisés husi ai-tarak neʼebé lakan. Ema Izraél hela neʼebá iha tenda ba tempu uitoan.

Ema hein iha kraik, no Moisés saʼe ba foho. Iha foho leten, Jeová fó-hatene Moisés katak Nia hakarak ema Izraél atu halo tuir Nia no sai Ninia povu espesiál. Kuandu Moisés tun, nia fó-hatene ema Izraél buat neʼebé Jeová hatete. No sira dehan katak sei halo tuir Jeová, tanba sira hakarak sai nia povu.

Agora, Jeová halo buat neʼebé foun. Nia halo ahi-suar mosu iha foho tutun no rai-tarutu makaʼas. Nia mós hatete ba ema: ‘Haʼu mak Jeová imi-nia Maromak, neʼebé lori imi sai husi Ejitu.’ Tuirmai nia haruka: ‘Imi labele adora maromak seluk maibé adora haʼu deʼit.’

Maromak mós fó ba ema Izraél ukun-fuan ka lei sia tan. Povu taʼuk tebes. Sira hatete ba Moisés: ‘Ita mak koʼalia mai ami, tanba ami taʼuk se Maromak koʼalia ami bele mate.’

Depois Jeová hatete ba Moisés: ‘Mai hasoru haʼu iha foho leten. Haʼu sei hakerek iha fatuk belar rua haʼu-nia ukun-fuan sira neʼebé haʼu hakarak povu atu halo tuir, no fó ba ó.’ Nuneʼe, Moisés saʼe fali ba foho. Nia hela iha neʼebá loron no kalan 40.

Maromak iha ukun-fuan barak tebes ba nia povu. Moisés hakerek ukun-fuan sira-neʼe. Maromak mós fó ba Moisés fatuk belar rua. Iha fatuk neʼe, Maromak rasik hakerek ukun-fuan 10 neʼebé nia koʼalia tiha ona ba povu tomak. Ita bolu lei sira-neʼe Ukun-Fuan Sanulu.

Ukun-Fuan Sanulu neʼe mak ukun-fuan importante. Maibé, ukun-fuan seluk neʼebé Maromak fó ba ema Izraél mós importante. Ukun-fuan ida mak neʼe: ‘Ó sei hadomi Jeová ó-nia Maromak ho ó-nia fuan tomak, ó-nia neon tomak, ó-nia klamar tomak no ó-nia forsa tomak.’ Ukun-fuan ida tan mak: ‘Ó sei hadomi ó-nia maluk hanesan ó-nia an rasik.’ Maromak nia Oan, Jesus Kristu, hatete katak ukun-fuan rua neʼe mak ukun-fuan boot liu neʼebé Jeová fó ba nia povu Izraél. Depois, ita sei aprende liután kona-ba Maromak nia Oan no buat neʼebé nia hanorin.