35-нҗи хекая

Ехова канун берйәр

ЫСРАЙЫЛЛЫЛАР Мүсүрден чыкып, такмынан ики айдан Сина дагына гелйәрлер. Оңа Хореп дагы хем дийилйәр. Шу ерде Ехова янып дуран гырымсы агачдан Муса билен гүрлешипди. Халк бу ерде чадырдан өй гурап, бираз вагт яшаяр.

Адамлар ашакда гарашярлар, Муса болса дага чыкяр. Дагың депесинде Ехова Муса ысрайыллыларың гулак асмалыдыгыны айтды. Себәби олары өз халкы этмек ислейәрди. Муса дагдан дүшүп, Ехованың сөзүни ысрайыллылара айдяр. Ысрайыллылар хем Ехованың халкы хөкмүнде оңа гулак асмага сөз берйәр.

Шонда Ехова гудрат гөркезйәр. Ол дагың депесини түсселедип, гөк гүррүлдедйәр. Соңра ол халка йүзленип: «Мен — сизи Мүсүрден чыкаран Худай Ехова» дийди. Шейле хем: «Сиз менден башга таңрылара сежде этмели дәлсиңиз» дийип табшырды.

Бу табшырыкдан башга-да Худай ысрайыллылара ене докуз табшырык, ягны канун берйәр. Халк горкудады. Олар Муса: «Бизиң билен өзүң гүрлеш, себәби Худай гүрлешсе өлерис өйдүп горкярыс» дийдилер.

Бирнәче вагтдан соң Ехова Муса: «Мениң яныма дага чык. Саңа ики текиз даша язан канунларымы берерин. Гой, мениң халкым олары берҗай этсин» дийип буюряр. Шонуң үчин Муса ене-де дага чыкяр ве ол ерде кырк гиҗе-гүндиз боляр.

Худай халка энчеме канун берйәр. Муса-да олары язып аляр. Мундан башга-да, Худай Муса ики текиз даш берйәр. Худай бу дашлара халка өң айдан он табшырыгыны язып берди. Муңа «Он табшырык» дийилйәр.

Бу Он табшырык өрән ваҗып канун хасапланяр. Йөне Худайың ысрайыллылара берен башга канунлары-да ваҗып. Ине, канунларың бири шейле диййәр: «Сен Ехова Худайыңы бүтин йүрегиң, бүтин җаның, бүтин дүшүнҗәң, бүтин гүйҗүң билен сөймели». Ине, ене-де бир канун: «Гоңшыңы өзүң ялы сөймели». Худайың оглы Иса Месих Ехованың Ысрайыл халкына берен канунларындан бу ики кануның иң эсасы канундыгыны айтды. Бираз соң биз Худайың Оглы ве онуң өвреден затлары барада көпрәк билерис.

Чыкыш 19:1—25; 20:1—21; 24:12—18; 31:18; Кануның гайталанышы 6:4—6; Левилилер 19:18; Матта 22:36—40.