Makani 35: Jehova Wapa Milawo Yakwe
KWAMYEZI iitandila kuli yobilo kuzwa nibakazwa ku Ijipiti, bana Isilayeli bakasika ku Cilundu ca Sinai alimwi ciitwa kuti Holebu. Oobu mbobusena Jehova mbwaakaambaula kuli Musa acitewu cakali kuyaka mulilo. Bantu bayaka zidumba akukkala kwamazuba masyoonto.
Bantu kabalindila kunselelo lyamulundu, Musa watanta acilundu. Atala lyacilundu, Jehova waambila Musa kuti uyanda kuti bana Isilayeli kabamuswiilila Jehova alimwi akuti babe bantu Bakwe bayandwa kapati. Musa aseluke acilundu, waambila bana Isilayeli Jehova ncaamwaambila. Bantu bazumina kumuswiilila Jehova nkaambo bayanda kuti babe bantu bakwe.
Jehova aciindi aawa wacita cintu cilamya. Wapa kuti cilundu mpocili atala citalike kusunta busi akuzuma kapati. Alimwi kubantu wati: ‘Ndime Jehova Leza wanu wakamuzwisya mu Ijipiti.’ Kumane walailila kuti: ‘Tamweelede kukomba baleza bambi kuleka ndime.’
Leza wabapa bana Isilayeli aimwi milawo iili fwuka. Bantu bayoowa kapati. Baambila Musa kuti: ‘Kwaambaula kuli ndiswe. Ikuti Leza aambaule nguwe kuli ndiswe, tulayoowa kuti inga twamana kufwa!’
Kumane Jehova waambila Musa kuti: ‘Tanta boola kuli ndime acilundu. Ndilakupa mabwe obilo aapapalede ngondalemba milawo njendiyanda kuti bantu kabaccilila.’ Aboobo, Musa alimwi waunka acilundu. Kwamazuba aali 40 masiku asyikati ulikkede ooko.
Leza ulijisi milawo minji kapati yakupa bantu bakwe. Musa wailemba milawo eeyi. Leza alimwi wamupa Musa mabwe obilo aapapalede. Amabwe aaya, Leza kumugama walemba milawo iili 10 njaakaambila bantu boonse. Eeyi milawo iitwa kuti Milawo iili Kkumi.
Milawo iili Kkumi milawo iiyandika kapati. Pele kuli aimwi milawo minji Leza njaapa bana Isilayeli. Umwi wamilawo eeyi ngwakuti: “Uleelede kuyandisya Jehova Leza wako amoyo woonse, amuuya wako woonse, anguzu zyako zyoonse.” Aumwi ngwakuti: ‘Weelede kuyanda mweenzyinyoko mbuli mboliyanda omwini.’ Mwana wa Leza, Jesu Kristo wakati eeyi njemilawo yobilo iinda kukomena Jehova njaakapa bantu bakwe bana Isilayeli. Kumpela tulaiya zintu zinji zya Mwana wa Leza alimwi amilimo yakwe.
Kulonga 19:1-25; 20:1-21; 24:12-18; 31:18; Deuteronomo 6:4-6; Levitiko 19:18; Matayo 22:36-40.
Mibuzyo
- Nkuli nkobakaunka kwaakukkala bana Isilayeli kakwiindide myezi iitandila kuli yobilo kabazwide kale mu Ijipiti?
- Ncinzi Jehova ncaamba eeco ncayanda kuti bantu bacite, alimwi ino balo baingula buti?
- Nkaambo nzi Jehova ncaakapa Musa mabwe obilo aapapalede?
- Milawo nzi aimwi Jehova njaakapa bana Isilayeli kunze lya Milawo iili Kkumi?
- Milawo nzi yobilo Jesu Kristo njaakaamba kuti njemilawo iinda kukomena?
Mibuzyo aimwi
- Bala Kulonga 19:1-25 20:1-21; 24:12-18; a 31:18.
Mbuti makani aalembedwe ku Kulonga 19:8 mbwaatugwasya kumvwisya zijatikizyidwe mukulyaaba kwa Bunakristo? (Mt. 16:24; 1 Pita 4:1-3)
- Bala Deuteronomo 6:4-6; Levitiko 19:18; a Matayo 22:36-40.
Mbuti Banakristo mbobatondezya luyando kuli Leza alimwi akuli basimukobonyina? (Maako 6:34; Inc. 4:20; Balo. 15:2)
