ЕГИ́ПЕТТЕН үнгенден бээр, ийи ай хире эрткенде, изра́ильчилер Сина́й, ооң өске ады Хорив, деп дагга келгеннер. Бо дээрге Моисе́й-биле Иегованың хып турган чадаң ыяштан чугаалажып турган демги-ле чери-дир. Маңаа чон майгыннар тиккеш, элээн үе дургузунда чурттап турар.

Кижилер адаанга артып каарга, Моисе́й даг кырынче үне берген. Аңаа Иегова Моисе́йге ажыткан: изра́ильчилер Ону дыңнап, чон кылдыр ооң сорулгазынга бараалгаарын Ол күзеп турар. Моисе́й дүжүп келгеш, изра́ильчилерге Иегованың сөстерин ол-ла хевээр дамчыдып берген. Изра́ильчилер Иегованың чону болурун күзээш, ону дыңнаарын аазап турар.

Ынчан Иегова бир-ле кайгамчыктыг чүвени кылган. Ол дагның бажын ышталдырып, диңмирээшкин даажын үндүрүпкен. Ооң соонда чонга: ‘Мен Иегова-дыр мен, силерни Еги́петтен үндүрген Бурганыңар-дыр мен.— Ынчангаш оларга дужааган: — Менден өске бурганнарга чүдүвес ужурлуг силер’.

Ол дүрүмден өске Бурган изра́ильчилерге оон ыңай тос дүрүмнү азы хоойлуну берген. Чон коргуп турар. Кижилер Моисе́йден дилеп турар: ‘Се́н бистиң-биле чугаалаш, чүге дээрге кажан Бурган бистиң-биле чугаалажы бээрге, өлүп каарындан коргуп тур бис’.

Элээн үе эрткенде Иегова Моисе́йге дужаап турар: ‘Менче даг кырынче үнүп кел. Мен сеңээ ийи калбак даш бээр мен, ында хоойлуларны бижээн мен, — мээң чонум оларны сагызын’. Ынчангаш Моисе́й катап даг кырынче үне берген. Ол аңаа 40 хүн болгаш 40 дүн дургузунда турган.

Бурган чонга дыка хөй хоойлулар берген. Моисе́й оларны бижип алган. Оон аңгыда, Бурган Моисе́йге ийи калбак даш берген. Ооң мурнунда бүгү чонга чарлап турган, Бурганның бодунуң бижээни 10 хоойлулар ында бижиттинген. Ол хоойлуларны Он дүрүм дээр.

Он дүрүм дыка чугула хоойлулар бооп турар. Ынчалза-даа Бурганның изра́ильчилерге бергени өске-даа хоойлулар база чугула бооп турар. Оларның бирээзи мынча деп турар: ‘Иегова Бурганыңга бүгү-ле чүрээң-биле, бүгү-ле угаан-сарыылың-биле, бүгү-ле сеткилиң-биле база бүгү күжүң-биле ынак болур ужурлуг сен’. А бо дээрге өске хоойлу-дур: ‘Чаныңда кижиге бодуңга ышкаш ынак болур ужурлуг сен’. Бурганның оглу Иисус Христос бо ийи хоойлуну, Иегованың бодунуң Изра́иль чонунга бергени, эң-не чугула хоойлулар кылдыр демдеглээн. Сөөлзүредир бис Бурганның Оглунуң дугайында болгаш ол чүнү өөредип турганының дугайында хөйнү билип алыр бис.