JUTUK xaʼox mu xchibaluk yual slokʼelik ta Egipto li j-israeletik ti kʼalal te kʼotik ta vits Sinaí, ti Horeb sbi xtoke. Jaʼ ti bu la jyichʼ kʼoponel yuʼun Jeova li Moisés ta jpets tsʼiʼlel ti xleblun skʼakʼale. Li jteklume te pajik, te nakiik jayibuk kʼakʼal.

Kʼalal muy batel ta vits li Moisese li krixchanoetike te kom smalaik ta olon. Li te ta vitse xi albat yuʼun Jeova ti Moisese: Ta jkʼan ti akʼo xchʼunik jmantal li j-israeletike xchiʼuk ti xkʼotik ta jtʼujbil lumale, xi. Kʼalal yal tal li Moisese, la jyalbe j-israeletik li kʼusi la jyal talel ti Jeovae. Li krixchanoetike la jyalik ti chchʼunbeik smantal ti Jeovae, yuʼun tskʼan chkʼotik ta slumal.

Vaʼun ti Jeovae oy kʼusi labal sba lik spas. La jyakʼ lokʼuk chʼail ta jol vits xchiʼuk tsatsal chauketik. Jech noxtok xi la jyalbe li jteklume: Voʼon Jeova aDiosun ti la slokʼesot tal ta Egiptoe. Vaʼun la jyalbe li mantal liʼe: Mu me xa muyubta yan diosetik, jtuk noʼox me xa muyubtaikun, xi.

Akʼbatik to yan baluneb mantaletik yuʼun Dios li j-israeletike. Li jteklume ta xiʼik tajek. Jech oxal xi la jyalbeik li Moisese: Kʼoponunkutik li voʼote, yuʼun mi chi skʼoponunkutik li Diose xuʼ chi chamkutik, xiik.

Ta mas tsʼakal ne xi albat yuʼun Jeova ti Moisese: Muyan tal liʼ ta vitse. Chkakʼbot chaʼpech ton ti te jtsʼibaoj li jmantaltak ti ta jkʼan akʼo xchʼunik li jteklume, x-utat. Jech oxal muy batel noxtok ta vits li Moisese. Jalij 40 kʼakʼal te.

Toj ep, toj echʼ noʼox ep li smantaltak Dios sventa li slumale. Jaʼ la stsʼiba li Moisese. Jech noxtok li Diose la jyakʼbe chaʼpech ton li Moisese. Li ta chaʼpech ton taje te stsʼibaoj li lajuneb smantaltak Dios ti yalojbe xa onoʼox li slumale. Jaʼ sbi Lajuneb Mantaletik.

Li Lajuneb Mantaletike toj tsotsik skʼoplal. Jech li epal mantal akʼbatik yuʼun Jeova li j-israeletike tsotsik skʼoplal ek. Jun mantale xi ta xale: Kʼano me ta skotol avoʼonton li Jeova aDiose, ta skotol ajol, ta skotol achʼulel xchiʼuk ta skotol atsatsal. Oy jun noxtok xi ta xale: Kʼano achiʼil jech kʼuchaʼal kʼux ta avoʼonton abekʼtal atuke. Jesucristo li xNichʼon Diose la jyal ti chib mantaletik taje jaʼ ti mas tsotsik skʼoplal la jyakʼbe slumal li Diose, li j-israeletike. Ta mas tsʼakal ep kʼusi ta jchantik ta stojolal li xNichʼon Diose xchiʼuk li chanubtaseletik la jyakʼe.