MGA duha ka bulan tikang nga ginawas an mga Israelita ha Ehipto, inabot hira ha Bukid Sinai nga tinatawag liwat nga Horeb. Dinhi hini nga lugar nakiistorya hadto hi Jehova kan Moises ha naglalaga nga kahoy-kahoy. Nagkampo hira dinhi ngan nag-ukoy hin madaliay.

Sinagka ha bukid hi Moises ngan naghulat ha ubos an mga tawo. Didto ha bukid, ginsumatan ni Jehova hi Moises nga karuyag Niya nga sundon Hiya han mga Israelita ngan magin Iya hira pinili nga katawohan. Han linusad hi Moises, iya iginsumat ha mga Israelita an ginsiring ni Jehova. Ngan nagsiring hira nga ira susundon hi Jehova kay karuyag nira nga magin Iya katawohan.

Yana, hi Jehova nagbuhat hin milagro. Nagpaaso hiya ha bawbaw han bukid ngan nagpadalugdog hin makusog. Ngan nagyakan hiya ha katawohan: ‘Ako hi Jehova nga iyo Dios nga nagpagawas ha iyo ha Ehipto.’ Katapos, hiya nagsugo: ‘Diri kamo magsingba hin lain nga mga dios gawas ha akon.’

An Dios naghatag ha mga Israelita hin siyam pa nga sugo, o balaud. Nahadlok gud an mga tawo. Nagsiring hira kan Moises: ‘Ikaw na la an pagyakan ha amon, kay nahahadlok kami nga kon magyakan ha amon an Dios bangin kami mamatay.’

Katapos, hi Jehova nagsiring kan Moises: ‘Sagka ngadi ha bukid. Ihahatag ko ha imo an duha nga papan nga bato nga akon ginsuratan han mga balaud nga karuyag ko nga sundon han katawohan.’ Salit, sinagka utro hi Moises ha bukid. Nagpabilin hiya didto ha sulod hin 40 ka adlaw ngan gab-i.

Damu gud an balaud han Dios para ha iya katawohan. Iginsurat ni Moises ini nga mga balaud. Iginhatag liwat kan Moises an duha nga papan nga bato nga ginsuratan mismo han Dios han iya 10 nga balaud nga iginsumat niya ha katawohan. Tinatawag ito nga Napulo nga Sugo.

An Napulo nga Sugo importante gud nga mga balaud. Kondi importante liwat an iba nga balaud nga iginhatag han Dios ha mga Israelita. Usa han mga balaud amo an: ‘Higugmaon mo hi Jehova nga imo Dios ha imo bug-os nga kasingkasing, bug-os nga hunahuna, bug-os nga kalag ngan bug-os nga kusog.’ Ngan an usa pa: ‘Higugmaon mo an imo igkasi-tawo sugad han imo kalugaringon.’ An Anak han Dios, hi Jesu-Kristo, nagsiring nga ini an duha nga pinakaimportante nga balaud nga iginhatag ni Jehova ha Israel. Damu pa an aton mahibabaroan mahitungod han Anak han Dios ngan han iya mga katutdoan.