BEY kaʼapʼéel mes jóokʼok le israelitaʼob Egipto ka kʼuchoʼob tu witsil Sinaí, kiaʼalaʼal xan Horeb tiʼ. Teʼelaʼ tiʼ tʼaʼan Moisés tumen Dios yiknal le chan cheʼ ku tóochʼeʼ. Teʼ túunaʼ chan máan kʼiin jelekbaloʼobiʼ.

Le ka naʼak Moisés teʼ witsoʼ, le israelitaʼoboʼ pʼáatoʼob u páaʼtoʼob u yéemel. Teʼeloʼ Jéeobaeʼ tiaʼalaj tiʼ Moisés u kʼáat ka uʼuyajtʼantaʼak tumen le israelitaʼoboʼ, yéetel ka kʼuchuk u beetubaʼob u kaajal. Le ka éem Moiseseʼ tiaʼalaj tiʼ le israelitaʼob baʼax tsʼoʼok u yaʼalik Jéeobaoʼ. Le israelitaʼob túunoʼ tiaʼaloʼob jeʼel u beetkoʼob le baʼax tsʼoʼok u yaʼalaʼaltiʼoboʼ, tumen u kʼáat u beetubaʼob u kaajal Jéeoba.

Jéeoba túuneʼ tu beetaj upʼéel baʼal jach jelaʼan. Tu beetaj u jóokʼol buutsʼ tu kaʼanlil le witsoʼ, yéetel tu beetaj u kʼaʼamkach kíilbal cháak. Tu tʼanaj xan le kaajoʼ ka tiaʼalaj: Teen Jéeoba a Dios le máax jóoʼsech Egiptooʼ. Ka túun tu tsʼáajtiʼob le leyaʼ: Maʼ adorartik uláakʼ diosoʼob wa maʼ teeniʼ.

Dioseʼ tu tsʼáaj tiʼe israelitaʼob uláakʼ nueve mandamientos wa leyoʼob. Le kaajoʼ jach sajakchaji. Le oʼolaleʼ tiaʼaloʼob tiʼ Moisés: Teech ka tʼaanakech t-éetel, tumen saajkoʼon k-kíimil wa ka tʼaanak Dios t-éetel.

Ku tsʼoʼokoleʼ, Jéeobaeʼ tiaʼalaj tiʼ Moisés: Naʼakkech way tu kaʼanlil le witsaʼ. Teneʼ yaan in tsʼáaiktech kaʼapʼéel táax tuunich tuʼux in tsʼíibmaj le baʼax in kʼáat ka u beet le kaajoʼ. Moisés túuneʼ naʼak tu kaʼatéen teʼ witsoʼ. Teʼeloʼ tu máansaj cuarenta kʼiinoʼob yéetel cuarenta áakʼabiʼiʼ.

Tiʼ Dioseʼ yaan yaʼabach leyoʼob utiaʼal u tsʼáa tiʼ u kaajal. Lelaʼ letiʼe tsʼíibtaʼaboʼob tumen Moisesoʼ. Dioseʼ tu tsʼáaj xan tiʼ Moisés le kaʼapʼéel táax tuunichoʼ. Teʼ tuunichoʼobaʼ, Dios tsʼíibtmail le diez leyoʼob tsʼoʼok u yaʼalik tiʼ le kaajoʼ. U kʼaabaʼ le leyoʼobaʼ, Diez Mandamientos.

Le Diez Mandamientosaʼ letiʼ u maas nuuktakil le leyoʼoboʼ. Baʼaleʼ, uláakʼ leyoʼob tu tsʼáaj Dios tiʼe israelitaʼoboʼ láayliʼ nuuktakoʼobeʼ. Upʼéel tiʼ leloʼobaʼ kiaʼalik: Kʼaʼabéet a yaabiltik Jéeoba a Dios yéetel tuláakal a puksiʼikʼal, tuláakal a tuukul, tuláakal a kuxtal yéetel tuláakal a muukʼ. Uláakʼ upʼéeleʼ kiaʼalik xan: Kʼaʼabéet a yaabiltik a wéet wíinikil jeʼex a yaabiltkabaʼeʼ. Jesucristo, u Paal Dioseʼ, tiaʼaleʼ leloʼobaʼ letiʼe kaʼapʼéel maas nojoch leyoʼob u tsʼaamaj Dios tiʼ Israel, u kaajaloʼ. Ichil uláakʼ tsikbaliloʼobeʼ yaʼab baʼax ken k-kan tiʼ u Paal Dios yéetel tiʼ u kaʼansajoʼob.