Historia 35

Jiobá rudii ca ley stiʼ

BIAʼ chupa beeu despué de bireecabe de Egipto la? ca israelita que bidxíñacabe ra nuu ti dani láʼ Sinaí ni laaca láʼ Horeb. Raríʼ nga ra guniʼné Dios Moisés dede lu yagahuiiniʼ naze bele lu que. Ca binni guidxi que biaanacaʼ raríʼ caadxi dxi.

Laga cabeza ca binni que ñee dani que la? Moisés riguiʼbaʼ lu dani que. Raqué, Jiobá na rabi Moisés de que Laabe racaláʼdxibe guzuubaʼ ca israelita que stiidxabe ne gueeda gácacaʼ guidxi Stibe ni gulibe. Ora biete Moisés la? rábibe ca israelita que ni guníʼ Jiobá. Ne ca binni que nacaʼ zuzuubacaʼ stiidxaʼ Jiobá purtiʼ racaláʼdxicabe gácacabe xquídxibe.

Yanna Jiobá runi xiixa ni qué huahuinni. Rúnibe de que de lu dani que guiree guʼxhuʼ ne guiree rayu naroʼbaʼ. Laaca riníʼnebe ca binni que ne rábibe laacaʼ: Naa nga Jiobá, Dios stitu ni gulee laatu de Egipto. Óraque Jiobá biʼniʼ mandar laacabe: Cadi guni adorartu xcaadxi dios mas que naatiʼ.

Dios rudii ca israelita ca xcaʼ mandamientu, o ley stiʼ. Ca binni que guizáʼ cadxíbicaʼ, ngue runi rábicabe Moisés: Guniʼné laadu lii purtiʼ cadxíbidu pa guiniʼné Dios laadu zátidu.

Despué la? na Jiobá rabi Moisés: Gudxiʼbaʼ lu dani riʼ. Chigudiéʼ lii chupa guié bata ra maʼ bicaa ca ley ni racalaʼdxeʼ gapa ca binni guidxi riʼ. Moisés riguiʼbaʼ sti biaje lu dani que. Pur cuarenta dxi ne gueelaʼ biaanabe raqué.

Dios napa stale, stale ley para xquidxi. Moisés rucaa cani. Dios laaca bidiibe guiropaʼ guié bata que Moisés. Lu cani la? Dios maʼ bicaa chii ley ni maʼ guníʼnebe ca binni guidxi que. Láʼ cani Chii Mandamientu.

Ca Chii Mandamientu riʼ la? nácacani ley nabé risaca. Peru xcaadxi ley ni bidii Dios ca israelita que la? laaca risaca cani. Tobi de laacani nga ndiʼ: Napuʼ xidé ganaxhiiluʼ Jiobá guidubi naca ladxidoʼloʼ, ne guidubi xquendabiaanuʼ ne guidubi xhiálmaluʼ ne guiráʼ stipa stiluʼ. Ne stobi nga: Napuʼ xidé ganaxhiiluʼ binni casi nadxiiluʼ lii. Jesucristu Xiiñiʼ Dios guníʼ de que ca ndiʼ nga chupa de ca ley ni jma risaca bidii Dios ca binni xquidxi, Israel. Despué la? zazíʼdirunu de Xiiñiʼ Dios ne cani bisiidibe.

Éxodo 19:1-25; 20:1-21; 24:12-18; 31:18; Deuteronomio 6:4-6; Levítico 19:18; Mateo 22:36-40.