Maana 36nan

Misiden sanulama

HE! Mɔgɔw bɛ ka mun de kɛ ten? U bɛ ka misiden de bato. Mun ye u bila o la?

Ikomi Musa mɛnna kulu kan, mɔgɔw ko: ‘An t’a dɔn fɛn min ye Musa sɔrɔ. O la sa, an ka ala dɔ dilan min bɛna an ɲɛminɛ ka bɔ nin yɔrɔ la.’

Musa kɔrɔkɛ Aron ko: ‘Ayiwa. Aw ye tulolasanuw bɔ aw tulo la ka na u di ne ma.’ Mɔgɔw nana u di Aron ma tuma min na, Aron ye o tulolasanuw yeelen, ka misiden sanulama dɔ dilan ni o ye. Jama ko: ‘Nin ye an ka ala ye min ye an labɔ Misira.’ Israɛlkaw tilala ka ɲɛnajɛba kɛ, ka misiden bato.

Jehova ye o ye tuma min na, a diminna kosɛbɛ. A y’a fɔ Musa ye ko: ‘I teliya ka jigin. Mɔgɔw bɛ ka kojuguba kɛ. U ɲinɛna ne ka sariyaw kɔ. U ye u biri misiden sanulama ɲɛkɔrɔ.’

 Musa y’i teliya ka jigin ka bɔ kulu kan. A surunyara tuma min na, a ye min ye, o filɛ: Mɔgɔw tun bɛ ka dɔnkili da, ka dɔn kɛ ka misiden sanulama lamini. Musa diminna fo sariyaw tun sɛbɛnna kabakurun pɛnpɛrɛnnen fila minnu kan, a ye olu fili duguma. U cira ka jɛnsɛn duguma. A ye misiden sanulama ta, k’a yeelen, ka tila k’a mugumugu.

Mɔgɔw tun ye kojuguba de kɛ. O la sa, Musa y’a fɔ cɛ damadɔw ye ko u ka u ka npan ta. A ko: ‘Mɔgɔjugu minnu ye misiden sanulama bato, olu ka kan ka faga.’ O la sa, o cɛ damadɔw ye mɔgɔ 3 000 faga. Yala o t’a jira ko an ka kan ka an yɛrɛ kɔlɔsi walisa an kana ala si wɛrɛ bato Jehova kelenpe dɔrɔn kɔ wa?

Ekisode 32:​1-35.