TALA KAMA! Yika atu analinga haliapwila? Ayo kanalembe kuli mwana-ngombe! Mumu liaka ayo analinga chuma chino?

Muze Mose te anashimbula chinji ku mulundu, atu yamba ngwo: ‘Yetwe tuso kunyingika yize yapwa kuli Mose. Kashika tulingenu umwe zambi hanga atuchize mu chifuchi chino.’

Arone, ndumbu ya Mose yamba ngwenyi: ‘Chinawaha.’ ‘Zulenu yingeliengelie ya oru, nawa yinehenu kuli yami.’ Muze atu halinga chocho, Arone yayizuzumuna yayilinga mwana-ngombe wa oru. Atu yamba ngwo: ‘Yono mwe Zambi yetu, yoze watutuhwisa mu Engitu!’ Hohene A-Izalele yalinga chiwanyino chinene, nawa yaputuka kuwayila mwana-ngombe wa oru.

Muze Yehova achimwene, iye yevwa uli unji. Kashika iye yamba kuli Mose ngwenyi: ‘Palumuka kawashi. Atu kanalinga upi unji. Ayo havulama shimbi jami nawa kanafulamana kulutwe lia mwana-ngombe wa oru.’

Mose yasunuka kawashi ku mulundu. Nawa muze iye ahetele ha kamwihi, yamona yino. Atu te kanembi hamwe ni kuhangana kulutwe lia mwana-ngombe wa oru! Mose yevwa uli unji iye yaholola yihanda yaali yamawe yize te yili ni shimbi, nawa mawe jacho yapalwoka. Iye yakwata mwana-ngombe wa oru yamwocha mu kahia ni kumufwenya hashi. Hohene yapwa fufuta.

Atu kanakalinga chuma chipi chinji. Kashika Mose yatuma malunga hanga ande tutana two. Mose yamba ngwenyi: ‘Atu eswe api waze te anawayila mwana-ngombe wa oru chatamba kwashaha.’ Mba malunga jacho yashaha 3,000 a atu! Yino yisokusolola ngwo yetwe ndo chatutamba kuwayila wika Yehova, hi tuzambi twa mahuza ko?