IA! INAI taunimanima be dahaka idia karaia noho? Idia be boromakau ta dekenai idia guriguri noho! Dahaka dainai unai bamona idia karaia?

Mose be ororo dekenai ia noho daudau neganai, taunimanima idia gwau: ‘Ita diba lasi dahaka ia vara Mose dekenai. Unai dainai dirava ta ita karaia inai tano amo ita ia hakaua siri totona.’

Mose ena kakana Arona ia gwau, ‘Vadaeni, emui golo taiana gaudia umui kokia, bona lau dekenai umui abia mai.’ Taunimanima be unai bamona idia karaia neganai, Arona ese unai gaudia ia gabua ela bona idia veve bona golo boromakau ta ia karaia. Bona taunimanima idia gwau: ‘Inai be iseda Dirava, Aigupito amo ita ia hakaua mai!’ Bena Israela taudia ese pati badana idia karaia bona golo boromakauna idia tomadiho henia.

Iehova ese unai ia itaia neganai, ia badu momokani. Unai dainai Mose dekenai ia gwau: ‘Oi diho haraga. Taunimanima idia kara dika noho. Egu taravatu idia laloaboio bona golo boromakauna idia tomadiho henia noho.’

Mose be karaharaga ororo amo ia diho. Bona kahirakahira ia lao neganai, inai kara ia itaia. Taunimanima be ane idia abia bona mai mavaru danu golo boromakauna idia gegea! Mose ia badu bada herea dainai taravatu nadi rua ia negea diho, bona idia makohi maragimaragi. Bena golo boromakauna ia abia bona ia gabua ela bona ia veve. Bena ia makohia bona pauda ai ia lao.

Israela taudia be kara dika bada herea idia karaia. Unai dainai Mose ese tatau haida ia hamaorodia edia tuari kaia do idia abia. Mose ia gwau: ‘Golo boromakau idia tomadiho henia taudia dikadia idia mase be namo.’ Bona unai tatau ese taunimanima 3,000 idia alaia mase! Unai ese ia hahedinaraia, Iehova sibona ita tomadiho henia be namo, bona dirava koikoidia ta lasi, ani?