Ondana yongoldo
EHUNGI 36
Ondana yongoldo
AYE, AYE! Ovandu mave ungura tjike? Mave kumbu kondana! Ongwaye tji mave tjiti nao?
Moses tja kakara oruveze orure kondundu, ovandu arire tji va tja: ‘Katu nakutjiwa kutja Moses wa katjitwa vi. Indjeye tu ri ungirire mukuru wotjisenginina ngu me tu hongorere!’
Aron erumbi raMoses wa tja: ‘Pe ri nawa, homoneye omautenda weṋu wongoldo, nu mu ete ku ami.’ Ovandu tjiva tjita nao, Aron wa zuzura na ungura po ondana yongoldo. Nu ovandu ave tja: ‘Ingwi eye oMukuru wetu, ngwe tu tjindisa moEngipte.’ Ovaisrael va ri nomukandi omunene nave rikotamene kondana yongoldo.
Jehova tja muna imbi, eye wa pindikire tjinene. Kunai eye wa tja ku Moses: ‘Hakahana twende, heruka pehi. Ovandu va katuka. Owo va zemba omatwako wandje nu mave rikotamene kondana yongoldo.’
Moses wa hakahana okuheruka kondundu. Neye tje ya popezu, imbi eye ombya muna. Ovandu mave imbura nokupunda ongondoroka nondana yongoldo! Moses wa pindika tjinene nga tja umba ovitjangero vivari vyomawe mbya ri nomatwako pehi, novyo vya nyanyauka moutupa ouingi. Okuzambo wa toora ondana yongoldo ne i zuzura. Neye we i kweya nga tji ya rira orunḓunḓura.
Ovandu va tjita otjiṋa otjivi navi. Kunai Moses wa raera ovandu tjiva ve toore omangaruvyo wawo. Moses arire tja tja: ‘Ovandu ovehinanḓuviro imba mbe rikotamene kondana yongoldo ngave ṱe.’ Okutja ovarumendu va zepa ovandu 3 000! Imbi mavi tu raisire kutja twa sokurikotamena ku Jehova erike, nungwari ka koomukuru wovisenginina.
