Ngewa ya 36: Kasaũ ka Thaavu
ASI, ASI! Andũ meĩkany’a ata? Mevoya kasaũ! Meĩka ũu nũndũ wa kĩ?
Yĩla Mose wekalile kĩĩmanĩ ĩvinda yĩasa, andũ nĩmaisye: ‘Tũyĩsĩ ũndũ ũla ũmũkwatĩte Mose. Kwoou ekai tũseũvye ngai ĩla ĩkatũtongoesya kuma nthĩ ĩno.
Nake Aluni mwana-a-inyia wa Mose amea, ‘Nĩkwĩkwe ũu. Umyai ngome sya thaavu ila syĩ matũnĩ menyu, na mũindetee.’ Yĩla andũ meekie ũu, Aluni aitwekethya na aseũvya kasaũ ka thaavu. Na andũ masya: ‘Ĩno nĩyo ngai yaitũ ĩla yatumisye nthĩ ya Misili!’ Na ĩndĩ Aisilaeli meethĩwa na mboka nene, na mathaitha kasaũ kau ka thaavu.
Yĩla Yeova woonie ũu, athilĩka mũno. Kwoou eea Mose: ‘Ũkĩla wĩkalaatĩte ũthee. Nũndũ andũ maendee na kwĩka naĩ nene. Nĩmolĩtwe nĩ mĩao yakwa namo methaitha kasaũ ka thaavu.’
Kwoou Mose atheea na mĩtũkĩ kuma kĩĩmanĩ. Na yĩla wathengeeie, ũũ nĩw’o woonie. Andũ nĩmainaa na kũsũnga mathyũlũlũkĩte kasaũ kau ka thaavu. Mose athatie mũno nginya amekya nthĩ ala masengea elĩ maandĩkĩtwe ĩla mĩao, namo matilĩkanga tũlungu twingĩ mũno. Na ĩndĩ oosa kala kasaũ ka thaavu akavĩvya na mwaki katweka, na akathia katw’ĩka mũtu.
Andũ meekie ũndũ mũthũku mũno. Kwoou Mose eea aũme amwe mose mbyũ syoo. Na asya: ‘Andũ athũku ala mathaithie kala kasaũ ka thaavu no nginya moawe.’ Na kwoou aũme asu moaa andũ 3,000! Ũndũ ũũ wĩonany’a kana nĩtwaĩlwe nĩkwĩsũvĩa na kũthaithaa Yeova e weka, na ti ngai ingĩ o na syĩva sya ũvũngũ.
Kuma 32:1-35.
Makũlyo
- Andũ meĩka ata visanĩ ũũ, na nĩkĩ?
- Yeova athatĩtw’e nĩ kyaũ, na Mose eekie ata yĩla woonie ũndũ andũ maendee na kwĩka?
- Mose eeie aũme amwe nĩmeke ata?
- Ngewa ĩno yaĩlĩte kũtũmanyĩsya ĩsomo yaũ?
Makũlyo ma kwongeleela
- Soma Kuma 32:1-35.
Ũvoo ũũ wĩonany’a ata woni wa Yeova ĩũlũ wa kũvulany’a ũthaithi wa ũvũngũ na ũla wa w’o? (Kuma 32:4-6, 10; 1 Ako. 10:7, 11)
Aklĩsto maĩlĩte kwĩsũvĩa ata yĩla meũnyuva maũndũ ma kwĩtanĩthya, ta kwina na kũsũnga? (Kuma 32:18, 19; Aev. 5:15, 16; 1 Yoa. 2:15-17)
Ana ma Alivai maiie ngelekany’o nzeo ata ĩũlũ wa kũũngama twĩlũmĩtye kwondũ wa ũlũngalu? (Kuma 32:25-28; Sav. 18:25)
