KʼARU yookebʼ xbʼaanunkil ebʼ laj Israel? Yookebʼ chi tijok chiru jun li pechʼbʼil yos. Kʼajoʼ xyiibʼal ru li yookebʼ xbʼaanunkil! Kʼaʼut naq yookebʼ xbʼaanunkil aʼin?

Naq laj Moises kibʼayk chaq saʼ li tzuul, ebʼ laj Israel keʼok xyeebʼal: ‹Inkʼaʼ naqanaw kʼaru xkʼul chaq laj Moises. Joʼkan naq qayiibʼaq junaq qayos re naq toorisi saʼ li naʼaj aʼin›.

Laj Aaron, ras laj Moises, kixsume xbʼaanunkil li pechʼbʼil yos ut kixye rehebʼ: ‹Kʼamomaq chaq we leekaʼxik ut leematqʼabʼ re oor›. Naq li tenamit kixbʼaanu aʼin, laj Aaron kiroksi li oor re xyiibʼankil jun li pechʼbʼil yos. Tojaʼ naq keʼxye: ‹Aʼin li qayos li kiʼisink chaq qe Egipto›. Chirix chik aʼan keʼxbʼaanu jun li ninqʼe ut keʼxloqʼoni li pechʼbʼil yos.

Li Jehobʼa kichalk xjosqʼil naq kiril aʼin. Ut kixye re laj Moises: ‹Ayu ut seebʼa aawibʼ, ilebʼ chaq laj Israel yookebʼ xbʼaanunkil li inkʼaʼ us. Xeʼxtzʼeqtaana linchaqʼrabʼ ut keʼxwiqʼibʼ ribʼ chiru jun li pechʼbʼil yos re oor›.

Joʼkan naq laj Moises kikubʼeek chaq saʼ junpaat. Ut naq kiril naq yookebʼ chi xajok ut chi bʼichank chiru li pechʼbʼil yos, kʼajoʼ naq kichalk xjosqʼil! Joʼkan naq kixkut chiru chʼochʼ li xchaqʼrabʼ li Yos ut keʼjoreʼk. Chirix chik aʼan, kixpukʼi li pechʼbʼil yos.

Nimla maak kixbʼaanu li tenamit. Joʼkan naq laj Moises kixye re jun chʼuut chi winq: ‹Chapomaq leechʼiichʼ ut teekamsi li keʼloqʼonink re li pechʼbʼil yos›. Joʼkan naq 3.000 keʼkamk. Aʼin naxkʼut chiqu naq kaʼajwiʼ li Jehobʼa tento tqaloqʼoni ru.