PANO nga abe bantu babena kuba ka papo? Babena kupopwela mwana ñombe! Mambo ka o babena kubila bibye?

Mosesa byo abanjile ku mutumba, bantu baambile’mba: ‘Kechi twayuka kyamumwekela Mosesa ne. Twayai tulenge lesa wa kwitutangijila kufuma mu ino ntanda.’

Kepo mulongo wa kwa Mosesa aye Alona ebambijile’mba: ‘Fumyai mashikiyo enu a ngolode ne kundetelao.’ Bantu byo bamupele mashikiyo, Alona wiasungulwile ne kulengamo mwana ñombe wa ngolode. Kabiji bantu baambile’mba: ‘Uno ye lesa wetu, witufumishe mu ntanda ya Ijipita!’ Kepo bena Isalela baikele na kijiilo kikatampe, ne kupopwela mwana ñombe wa ngolode.

Yehoba byo amwene kino wazhingijile bingi. Waambijile Mosesa amba: ‘Kunkuluka panshi. Bantu babena kuba bintu byatama bingi. Balubamo mizhilo yami kabiji babena kupopwela mwana ñombe wa ngolode.’

Mosesa wapelawizhizhe kufuma ku mutumba. Byo afikile kwipi, abino byo byo amwene. Bantu baimbilenga nyimbo ne kuzha saka bazhokoloka mwana ñombe wa ngolode! Mosesa wazhingijile bingi kya kuba watayile panshi mabwe abiji apapakana panembelwe mizhilo, ne kulajika alajikile mu bipimvwa byavula. Kepo atolele yewa mwana ñombe wa ngolode ne kumusungulula, ne kumuvingakanyatu nobe bunga.

Bantu baubile kintu kyatama bingi. Onkao mambo, Mosesa waambijile banabalume bamo kutola mapoko abo. Mosesa waambile’mba: ‘Bantu batama baji kupopwelanga mwana ñombe wa ngolode bafwainwa kufwa.’ Kepo bano banabalume baipaile bantu 3,000! Nanchi kino kechi kimwesha’mba twafwainwa kujimuka ne kupopwelatu Yehoba kwapwa, ne kubula kupopwelapo balesa ba bubela nenyi?