Bip Lupia Gul Wal Paskan Ba
Sturka 36
Bip Lupia Gul Wal Paskan Ba
DUPALI aihwa! Nanara upla nani ba dia daukisa? Witin nani bip lupia kum ra ai pura suni bangwisa! Sakuna dia muni witin nani baku daukisa ki?
Moses ba il purara uli uba wihka takaskan pyua ra, upla nani ba naku aisi kan: ‘Yawan Moses ra dia takan sapa nu apu sa. Kaisa yawan gâd kum naha tasba wina wan sakbia dukyara paskaia.’
Bara Moses muihnika almuk Eran ba win: ‘Uba pain, kyamam lula nani gul wal paskan ba daiki bri sal aik.’ Bara upla nani baku daukan taim, Eran mita slilki gul bipka lupia kum paskan. Bara upla nani ba bila: ‘Naha sika wan gâdka, Idsipt tasbaia wina wan sakan ba!’ Bara witin nani ai lilia tara brih bipka lupia ba ra ai pura suni mayuni kan.
Bara Jehova naha kaikan taim uba ai kupia sauhkan. Bara Moses ra naku win: ‘Man isti pali mayara iwi was. Kan upla nani ba uba saura dauki bangwisa. Witin nani lâika nani ba swisisi bip lupia kum ra ai lula kriki mayunisa.’
Bara Moses ba minitka ra il wina iwi balan. Bara witin lamara balan taim, upla nani ba bipka lupia ba tnaya kir ra aiwani dans puli bangwi kan kaikan! Bara witin uba ai kupia sauhki walpa tahnta wal ra lâ nani ulban kan ba lulki sabi baikan. Baha wina witin bipka lupia ba brih kli slilki yahmpus baku daukan.
Uplika nani ba diara uba saura kum daukan. Baha mita Moses bui waitna kum kum ra ai sordka ba ridi daukbia win. Bara witin win: ‘Ya bip lupia ra ai pura suni mayunan nani ba sut pruaia sa.’ Baha mita waitnika nani ba upla 3.000 ra ikan! Naha ra tanka wan mariki ba baku, yawan sika Jehova ra baman mayunaia sa, gâd kuninkira nani watlika ra!
