OI AUE! Ko e heigoa he tau tagata ne fa e taute mogonei? Hane liogi a lautolu ke he punua povi! Ko e ha ne taute e lautolu e mena nei?

Ha kua leva e nofo ha Mose he mouga, ti pehē e tau tagata: ‘Nakai iloa e tautolu ko e heigoa e mena kua tupu ki a Mose. Ti o mai la ke taute taha atua ke takitaki kehe a tautolu mai he fonua nei.’

‘E mitaki,’ he ui he matakainaga ha Mose ko Arona. ‘Kia utakehe e tau auro he tau teliga ha mutolu, ti ta mai ai kia au.’ Ne taute pihia he tau tagata, ti fakatataka ai e Arona mo e talaga aki e punua povi auro. Ti pehē e tau tagata: ‘Ko e ha mautolu a Atua hanai, ne ta hake a mautolu mai he motu ko Aikupito!’ Ti taute he tau Isaraela e fakafiafiaaga lahi, mo e tapuaki ai ke he punua povi auro.

Magaaho ne kitia e Iehova e mena nei, ne ita lahi a ia. Ti pehē a ia ki a Mose: ‘Hifo fakaave. Kua kelea lahi tuai e mena kua taute he tau tagata. Kua nimo e lautolu e tau fakatufono haaku ti kua hufeilo a lautolu ke he punua povi auro.’

Ne hifo mai fakaave a Mose he mouga. Ti ko e magaaho ne tata atu a ia, hanei e mena ne kitia e ia. Kua lologo mo e koli viko e tau tagata he punua povi auro! Ne ita lahi a Mose ti tolo hifo e ia e tau lapa maka ua ne tohi ai e tau fakatufono, ti malipilipi ai. Ti uta e ia e punua povi auro mo e huhunu ke he afi. Ti tukituki fakavalavala ikiiki e ia ke efuefu.

Kua kelea lahi e mena ne taute he tau tagata. Ti tala age a Mose ke he falu tagata taane ke tamai e tau pelu ha lautolu. ‘Ko e tau tagata kelea ne tapuaki ke he punua povi kua lata ni ke tamate,’ he talahau e Mose. Ti tamate ai he tau tagata taane, toko 3,000 e tagata! Nakai kia fakakite mai he mena nei kua lata ni a tautolu ke mataala ke tapuaki hokoia ni ki a Iehova, mo e nakai tapuaki ke he ha atua fakavai?