AYAYAI! Kiko e pueblo ta hasiendo awor? Nan ta hasi orashon na un bisé! Pakiko nan ta hasi esei?

Ora ku Moisés a keda pa hopi tempu riba e seru, e pueblo a bisa: ‘Nos no sa kiko a pasa Moisés. Pues, ban traha un dios pa hiba nos for di e tera aki.’

Aaron, ruman hòmber di Moisés, a bisa: ‘Ta bon. Kita tur boso renchi di oreanan di oro i trese nan pa mi.’ Ora e pueblo a hasi esei, Aaron a smèlt nan i a traha un bisé di oro. Despues e pueblo a bisa: ‘Esaki ta nos Dios ku a saka nos for di Egipto!’ Anto e israelitanan a tene un fiesta grandi i a adorá e bisé di oro.

Ora Yehova a mira esei, el a bira masha rabiá. P’esei el a bisa Moisés: ‘Hasi lihé bo baha. E pueblo ta hasiendo kos masha malu. Nan a lubidá mi lei i ta bùig pa un bisé di oro.’

Moisés ta baha purá for di e seru. I ora e yega serka, esei ta loke e ta mira. E pueblo ta kanta i baila rònt di e bisé di oro! Moisés ta bira asina rabiá ku e ta tira e dos tablanan di piedra di e leinan na suela, i nan ta kibra na pida-pida. Anto Moisés ta kohe e bisé di oro i dirtié. Despues e ta garn’é na stòf.

E pueblo a hasi un kos mashá malu. P’esei Moisés ta bisa vários hòmber pa kohe nan spada. ‘E mal hendenan ku a adorá e bisé di oro tin ku muri,’ Moisés a bisa. P’esei e hòmbernan ku spada ta mata 3.000 hende! Esei no ta mustra ku nos tin ku tene kuidou pa no adorá diosnan falsu, sino Yehova so?

Eksodo 32:1-35.