Tantara 36

Anak’aomby Volamena

INO va raha ataon’olo reto io? Mivavake amy anak’aomby volamena io roze! Ino ty antone anaòvan-droze raha io?

Laha fa nijàno ela tamy vohitse iny tany Mosesy, le nivòla ty olo hoe: ‘Tsy haintsika ty raha nahazo an’i Mosesy ane, ka ndao tsika hanamboatse andranahare hitarike antsika hiala amy tany toy eto.’

‘Eka’, hoy ty asan’i Arona rahalahin’i Mosesy. ‘Apotàho iaby ty kivìronareo volamena, ka andeso amiko atoy.’ Samby nanday ty aze iaby ty olo. Navorin’i Arona raha reny sady notranàhine, ka nanamboarane anak’aomby volamena. Nivòla ty olo hoe: ‘Io ty Andranaharentsika aze nitarike antsika hiboake baka Ejipta ao iny!’ Nanao fety be ty Israelita laha fa bakeo, sady nivavake tamy anak’aomby volamena io.

Neloke biby Jehovah laha fa nahita raha zay. Nivòla tamin’i Mosesy ie hoe: ‘Mijotsòa iha. Nanao raha raty biby olo reo. Halinon-droze ty lalàko, ka mandohalike amy anak’aomby volamena io roze.’

Nijòtso baka amy vohitse eny malaky Mosesy. Laha fa nihanarìny ie, le nahita ty raha nataon’Israelita reo. Mihira noho mitsinjake manodidy anak’aomby volamena iny iaby ty olo! Neloke biby Mosesy, ka le natòntane tamy tany vato fisake roe nisy lalàna reny, bakeo nopotepotehine. Laha fa bakeo, le nalàne kea anak’aomby volamena iny, ka natòntane tamy tany sady notorotoròne.

Raty vatane raha nataon’olo reo. Novolànin’i Mosesy ty lahilahy sasane mba hangalake ty sabatsin-droze. Ka hoy Mosesy hoe: ‘Ze olo nivavake tamy anak’aomby volamena io le tokone hovonòa iaby.’ Nahafaty olo 3 000, lahilahy reo! Tsy mampiseho va raha zay fa tsy tokone hivavake ami-ndranahare hafa tsika laha tsy amin’i Jehovah raike avao?

Eksodosy 32:1-35.