ХАА, БО кижилер ам чүнү кыла бергени ол? Олар бугажыкка мөргүп турар! Чүү дээш, ынчаш?

Моисе́й дагдан үр дүшпес боорга, ынчан чон шиитпирлеп алган: ‘Моисе́й-биле чүү болганын билбес-тир бис. Ынчаарга бо черден бисти үндүрүптер бургандан кылып алыр-дыр, че’.

— Ындыг-дыр,— деп, Моисе́йниң акызы Ааро́н чөпшээрешкен.— Кулактарыңарда алдын сыргаларны уштупкаш, меңээ эккеп бериңер.— Чон сыргаларны эккээрге, Ааро́н оларны эзилдиргеш, алдын бугажыкты кылып каан. Оон чон: ‘Бисти Еги́петтен үндүрген Бурганывыс бо-дур!’ — деп хөлзеп алгырып турар. Ооң соонда изра́ильчилер улуг байырлал эрттирип, алдын бугажыкка чүдүп турлар.

Иегова ону көргеш, аажок килеңней берген. Ол Моисе́йге дужааган: ‘Дүрген бада бер. Чон улуг бачыт кылып тур. Ол мээң хоойлуларымны уттупкаш, алдын бугажыкка чүдүп тур’.

Моисе́й далаштыы кончуг дагдан бада берген. Ооң көрүп каан чүүлү бо-дур. Чон алдын бугажыкты долгандыр ырлап, танцылап турган! Моисе́й ол дээш дыка килеңнээн, безин ийи калбак дашты черже октаптарга, олар чуурлуп чаштай берген. Оон ол алдын бугажыкты алгаш, эзилдирип каапкан. А ооң артканын үүредир чууруп каапкан.

Чон кончуг бак чүве кылган. Ынчангаш Моисе́й каш эр кижиге селеме ап алырын дужааган. ‘Алдын бугажыкка чүдүп турган өөдежок кижилерни өлүрүңер’,— деп, ол дужаал берген. Оларның холундан 3 000 кижи өлген болган! Өске кандыг-даа меге бурганнарга чүдүвейн, чүгле Иеговага чүдүүр кылдыр, бодувусту үргүлчү кичээнип чоруурун бо болуушкун көргүзүп турар эвес-тир бе?