ÁAY, ¿baʼax ku beetik le máakoʼob beyaʼ? ¡Táan u payalchiʼob tiʼ utúul chan wakax! ¿Baʼaxten táan u beetkoʼob lelaʼ?

Le ka pʼáat Moisés yaʼab kʼiin teʼ witsoʼ, le kaajoʼ tiaʼalaj: Maʼ k-ojel baʼax tsʼoʼok u yúuchul tiʼ Moisesiʼ. Koʼoneʼex beetik utúul dios ka u jóoʼsoʼon teʼ luʼumaʼ.

Aarón, u sukuʼun Moiseseʼ, tiaʼalaj: Maʼalob, taaseʼexten tuláakal le baʼax yanteʼex beetaʼan yéetel orooʼ. Le ka tu taasoʼobeʼ, Aaroneʼ tu yibaj, ka tu beetaj utúul chan wakax tu yéetel. Le kaaj túunoʼ tiaʼalaj: ¡Lelaʼ letiʼe k-Dios jóoʼsoʼon tu kaajil Egiptooʼ! Ka túun tu beetoʼob upʼéel nojoch kʼiimbesaj utiaʼal u chintaloʼob tu táan le chan wakax beetaʼab yéetel orooʼ.

Ka tu yilaj Jéeoba lelaʼ, jach kʼuuxilnaji, ka tiaʼalaj tiʼ Moisés: Éemkech tu séebaʼanil. Le kaajoʼ táan u beetik baʼax kʼaas. Tsʼoʼok u tuʼubskoʼob baʼax in waʼalmajtiʼob, táan u chintaloʼob tu táan utúul chan wakax beetaʼan yéetel oro.

Moisés túuneʼ, tu séebaʼanil éem teʼ witsoʼ. Le ka náatsʼeʼ, letiʼe baʼax tu yilaʼ: ¡Le máakoʼoboʼ táan u kʼaayoʼob yéetel táan u yóoʼtoʼob tu baʼpaach le chan wakaxoʼ! Moisés túuneʼ jach kʼuuxilnajeʼ ka tu táajchʼintaj le kaʼapʼéel táax tuunich tuʼux tsʼíibtaʼan le leyoʼoboʼ, ka paʼapajoʼob. Ka túun tu machaj le chan wakaxoʼ ka tu yibaj. Ku tsʼoʼoleʼ ka tu mamay juchʼtaj.

Le kaajoʼ jach kʼaas baʼax tsʼoʼok u beetik. Le oʼolaleʼ, Moiseseʼ tiaʼalaj tiʼ jujuntúul xiiboʼob ka u jíilpayt u táatsʼ máaskaboʼob, tiaʼalajtiʼob xan: Le máaxoʼob chinlajoʼob tu táan le chan wakaxoʼ kʼaʼabéet u kíimloʼob. ¡Le oʼolaleʼ, le xiiboʼoboʼ tu kíimsoʼob 3.000 máakoʼob! Lelaʼ, ¿máasaʼ ku yeʼesiktoʼon chéen Jéeoba kʼaʼabéet k-adorartik?