¿AKAX kuna jachʼa utas uk yattati? Jehová Diosar yupaychañatak suma utawa. Tabernáculo satarakiwa. Egiptot mistxasaxa mä maranakwa aka uta tukuyapxäna. ¿Khitis aka uta lurañ amtänxa, uk yattati?

Jehová Diosaw uk amtäna. Moisesax Sinaí qullunkaskäna ukhaw Jehová Diosax kunjamsa uka utax lurasini ukxa yatiyäna. Jankʼak jararañjamwa luräta sänwa. Ukhamatwa yaqha chiqar apañax jan chʼamäkaniti sasa. Kunapachatï israelitanakax wasaran mä chiqat yaqha chiqar sarxapxäna ukhaxa, jupanakamp chikwa aka utxa apapxäna.

Aka jachʼa utanxa, khuri kʼuchun mä jiskʼa utaw utji, ¿ukan mä caja uñjtati? Uka cajax Diosampi arustʼäwir mantat arka satawa. Aksat uksat qurit lurat pä querubín angelanakaw uka patxan uchatäna. Diosax wasitampiw sillpʼa qalanakxaru Tunka Mandamientonaka qillqäna, kunattix Moisesaw nayrïr qalanakxa jaqtʼasin tʼunjäna. Uka qalanakaw uka arka manqhan imatänxa. Ukat uka arkanxa maná manqʼaw mä chaturu (jarra) imatarakïnxa. ¿Kunänas maná manqʼax uk amttati?

Jehová Diosax Moisesan Aarón jilaparuw jilïr sacerdotet uttʼayäna. Jupaw Jehová Diosar yupaychäwinxa pʼiqtʼäna. Ukat wawanakapax sacerdotenakäpxarakïnwa.

Jichhax aksankir jachʼpach ut uñxattʼañäni. Khuri jiskʼa utat sipansa jachʼawa, mä ukchʼat mä ukchʼampiwa. ¿Cajat jiwqʼi mistuski uk uñjtati? Ukanwa sacerdotenakax incienso phichapxirïna, wali sum thujsañapataki jan ukax qʼaphiñapataki. Ukat paqallq michanakan candelabro uñtarakma. Ukatxa mä mesarakiw utji, ukaruw 12 tʼantʼanak uchapxäna.

Diosar yupaychañ uta anqäxanxa, umani mä jachʼa llataw utjäna. Sacerdotenakaw ukan jarisipxirïna. Ukatxa mä altaraw utjarakïna, ukanwa Jehová Diosaru jiwat animalanak luqtapxäna. Yupaychañ utaxa taypinkänwa, israelitanakan carpanakapamp muyuntatänwa.