Abahüdaguni 37

Kianpu lun áhuduraguni

SUBUDITI san bun katoun lan muna to? Aban kianpu espechalitu lun lahudurawagun lun Heowá. Tabernákulu o Sanduariu lagúahoun tun. Óunwebudagüda hamutu gürigia lidan aban irumu lárigiñe háfuridun Ehiptugiñe. Subuditi san bun ka lan asaminarubei lun ladügünu?

Heowá asaminarubalin. Dan le anihagua lan Moisesi luagun wübü Sinaí, aba lariñaguni Heowá lun ida luba lan tadügün lun ménrengun lan taragachawagun. Ítarati sun burí fánreinti gayarabei lanügün lidoun amu fulasu, lun táfadarawagun tárigoun. Ligíati, dan le meha háguyunbei lídangiñe aban fulasu lun amu lidan fulasu mageirawati, barǘ hamutu kianpu tuguya hámagua.

Ánhabu ariha lidoun lagumuhóun kuartu ñǘraüti tidan kianpu, gayarati barihin aban gafu. Bágüsi to lánina daradu tíribei. Añahein meha bián ánheli o kerubín lautiña golu ñein, aban luagu kada oubaü. Ábaya labürühani Bungiu Diisi Gumadi luagu bián dübü fadati, ladüga labouchaguni Moisesi le furumiñeti ani areiduwati tidan bágüsi lánina daradu luma aban fudu tau maná. Haritaguabagili ka lan manáboun?

Anúadira lumuti Heowá Aarón le líbiri Moisesi lun ligíaba lan fádiri le íñutimabei. Alidiha lumutiñu gürigia lidan áhuduraguni lun Heowá. Fádirigu giñe lirahüñü.

Arihabei kuartu le wéiritimabei. Dóbuliti liseisi luéi kuartu ñǘraüti. Ariha bumutu gafu ñǘraütu to idangiñeboun liñura gumuleli? Latarü lira, ñein hágudaha fádirigu kupali, aban katei buiti líhemen. Arihabei giñe lebu sanudelu lau sedü lanpu. Lǘrüwan katei lidan kuartu aban dábula, kipuwati 12 fein ligibuagu.

Lidan lubürürün sanduariu anihein aban ágeidinaü wéiriti, o diná, buin lau duna. Yusu hamuti fádirugu lun hachibuni háhabu luma hagudi. Anihein giñe óunwebu latarü ñein. Ñein háguduwa animaalugu hilaaña kei adagaragüdǘni lun Heowá. Kianpu tuguya lamidanguañoun kianpu-agei, wínwantiñu ísüraelina tidan kianpu geyegu tau.

Áfuriduni 25:8-40; 26:1-37; 27:1-8; 28:1; 30:1-10, 17-21; 34:1, 2; Ebüréu 9:1-5.