HÖ, A nemene uma cahu? Ka ketre pengön pe kö la uma maano celë, hna kuca thatraqan la hmi i Iehova. Hna hëne mina fe ka hape, uma ne heta. Hna afenesin la uma hnei angetre Isaraela, caa macatre thupen lo hnei angatr hna lö pi qaa Aigupito. Drei la atrekë mekunene lai?

Mekune i Iehova hi lai. Ame ngöne lo Mose e hune lo wetre Sinai, Iehova hi lai a amaman koi angeic la pengöne uma nyine troa kuca. Hnei Nyidrë hna upi angeic troa kuca la iuma cili, thaa tro kö a acile hutin, ngo atreine hi troa feje hnyawa me xome trongën ej, göi troa acile pena ngöne la ketre götran. Celë hi matre, hnei angetre Isaraela hna kuca la ketre uma maano ka hmaloi hi e troa fej, me ajön trongën ngöne la nöjei götran jë i angatr ngöne la hnapapa.

Ka lue hnahagen la uma ne heta, ame la neköi hnahage ka co pe e kohië can la uma, hna amë hi e cili la ketre pua. Hna hën ej ka hape, pua ne isisinyikeu. Lue angela, kerubi gool, a isa cil hune lai lue götran. Hnei Akötresie hna cinyihane hmaca lo Treen Lao Trenge Wathebo ngöne la lue etë, matre nyihnane lo lue hnei Mose hna thë akaqan. Hna amë la lue etë cili e hnine la pua ne isisinyikeu. Hna hane amë mina fe la ketre gee, nge hna nyialiene ej hnei mana. Nemen lo mana? Mekune hi nyipunieti lo lai ewekë cili?

Hnei Iehova hna ië Arona trejine me Mose, troa atre huuj ka sisitria. Qa i nyidrëti troa cilën la itre nyine kuca hnene la nöj, göi troa hmi koi Iehova. Itretre ixatua mina fe la itre nekö i nyidrë, itretre huuje fe angatr.

Ame cahu ketre hnahag, ka tru kö hune lo ketre. Troa alu lo lai hnahag ka co. Öhne fe hi nyipunieti la kola elë la so qa hune cahu sine kees? Celë hi ita ne huuje lai, hnë troa dreu sinöe ka pui loi, hnene la itretre huuj. Hna thinane ej hnene la ketre ilam, nyine athip la seven lao lamepa. Hetrenyi fe la ketre laulau, celë hi hnaakönine alien lai hnahag. Nge 12 lao falawa ka të pala hi hune la laulau.

Ame e tröne la uma ne heta, hetrenyi la ketre trepene si ka tru maine basë, ka tiqa hnei tim. Kola siën la timi cili, hnene la itretre huuj. Hetrenyi fe e cili la ketre ita ne huuj ka tru. Hna dreuth e cili la itre öni ka meci hë, nyine huujën koi Iehova. Eje e nyipine la hlapa la uma ne heta, nge angetre Isaraela a lapa xötreithe ej.