Ondanda yomerikotameno
EHUNGI 37
Ondanda yomerikotameno
OVE mo tjiwa kutja omatungiro inga owatjike? Oyo ondanda yapeke yokurikotamena ku Jehova. Oyo wina i isanewa kutja otabernakela. Ovandu va mana okuitunga ombura imwe kombunda yaindu tji va za nokupita moEngipte. Ove mo tjiwa kutja ya ri ondunge yauṋe okuitunga?
Oyo ya ri ondunge yaJehova. Ngunda Moses a ri kombanda yondundu Sinai, Jehova we mu raera kutja ma sokuitunga vi. Eye wa tja nge i tunge kutja i rire oupupu okuhaṋaura. Momuano mbwi otupa aatu yenene okutoorwa okutwarewa koruveze rwarwe, okutja ngo ai tungururwa rukwao. Kunai Ovaisrael tjaave tjindi okuza koruveze rumwe nga kurwarwe mokuti onguza, aave twaerere ondanda puna wo.
Tjiwa tara mokatuwo inga okaṱiṱi komaandero wondanda, ove mo munu otjikesa poo otjipwikiro. Otjo tji isanewa kutja otjipwikiro tjomerikutiropamwe. Otjo tja ri novaengeli vevari poo ovakerubi mba ungurwa pongoldo, umwe kotjikoro atjihe. Mukuru rukwao wa tjanga Omatwako Omurongo komawe yevari omapapi, mena rokutja Moses inga omatenga wa teya. Nu omawe nga aaye ṱizirwa moukoto wotjipwikiro tjomerikutiropamwe. Otjitjuma tjomana wina aatji ṱizirwa mu tjo. Ove mo zemburuka kutja omana ovikwaye?
Aron, erumbi raMoses, ongwa toororwa i Jehova okurira omupristeri omunene. Eye wa hongorera po otjiwaṋa mokurikotamena ku Jehova. Ovazandu ve wina va ri ovapristeri.
Nambano tara ketuwo enene rondanda indji. Oro enene potuvari pu indi eṱiṱi. Okakesa mu mamu piti omuise, ove mo ke munu? Ihi otjipunguhiro ovapristeri ku ve twimisira oviṋa mbi ṋuka nawa mbi isanewa kutja ovyomoro omuwa. Okuzambo pe na otjikurameno tjomamunine tji tji nomamunine hambombari. Nu otjiṋa otjitjatatu tji tji ri metuwo ndi otjiriro. Kombanda yatjo ku ṱizirwa ozomboroto 12.
Morumbo rwondanda mu notjiyaha otjinene, tji tje urisiwa nomeva. Ovapristeri ve tji ungurisa kokukoha. Opo wina pe notjipunguhiro otjinene. Imba opu pe ningiririsirwa ovipuka mbya koka otja ombunguhiro ku Jehova. Ondanda yomerikotameno ndji ya ri mondivitivi yomaturiro, nu Ovaisrael va turire mozondanda zawo ongondoroka na yo.
Eksodus 25:8-40; 26:1-37; 27:1-8; 28:1; 30:1-10, 17-21; 34:1, 2; Ovaheberi 9:1-5.
