Icisimicisyo 37: Itente lya Kupempelelamo
KANI ulicisi ici icakwibaka? Litente ililibelele ilya kupempelelamo baYehoba. Liletwa nakabili ati isema. Abantu balisilile ukulibaka ili papitile umwaka umo ili bafumine mu Ijipiti. Kani waisiba uwali umwine we langulusi lya kulibaka?
Lyali lilangulusi lya baYehoba. Ili Mose aali peulu pa Lupili lwa Sinai, baYehoba balimubulile ifya kulibaka. Balilabile ukulibaka icakweba’ti cingaba icipubile ukulifikaula. Muli iyi’nsila ifiputusya fingapintwa ku mupunda umbi, kabili uko fingafikwa pamo nakabili. Popele ili abaIsilaeli balukuseuluka mu mipunda iipusenepusene mu mpanta, balilipintile itente konse uko baali.
Kani walolesya mukati mu kapinda akanini ku mpelo ye tente, ungabona imbokosi. Iyi iletwa’ti imbokosi ya kulayana. Yalikwete sibili inkalamba neli bakelubi ababumbilwe ne golide, umo umo ku mpelo. BaLesa nakabili balilembele Amafunde Ikumi pa maseleti abili aapapatele, pakuti Mose alitobele aya kutanga. Kabili aya mabwe alukusungilwa mukati ka mbokosi ya kulayana. Inongo iyalimo mana nayo yalukusungilwa mukati ka mbokosi ya kulayana. Kani waanuka ici mana ili?
Aloni umukwabo Mose ewo baYehoba basalulula ukuba umupapatilisi umukulu. Alatungulula abantu mu kupempela baYehoba. Kabili abana bakwe nabo bapapatilisi.
Pano lolesya mu cipinda icikulupo ice tente. Cikulupo pa kapinda akanini imiku ibili. Kani waibona imbokosi inini ne cusi icilukufutumukapo? Ici conto apo abapapatilisi bocela ifintu fimo ifinunkiile bwino. Eli muli icakutekapo inyale icikwete inyale sisanu na sibili. Kabili ne cintu ca butatu icili mu cipinda litebulu. Pali lyo e pasungilwa ba sinkwa 12.
Mu lubansa lwe sema muli icibeseni icikulu, iciswilemo amenda. Abapapatilisi balukusambamo ku maboko na ku molu muli co. Kabili muli conto icikulu. Apo epo bocela inama isifwile ku kupelo’mulambu kuli baYehoba. Itente lili penka pakati ke bumba, kabili abaIsilaeli baikala ukulisinguluka lyonse mu matente abo.
Ifyakufuma 25:8-40; 26:1-37; 27:1-8; 28:1; 30:1-10, 17-21; 34:1, 2; AbaEbeya 9:1-5.
Ifyakwipusya
- Icakwibaka icili mu cikope balacita ati cindo, kabili balacipyungisya kundo?
- Mba nindo baYehoba bamubulile Mose ukulibaka itente icakweba’ti cingaba icipubile ukulifikaula?
- Kani ni mbokosi yando ilya iili mu kapinda akanini ku mpelo ye tente, kabili findo filimo mu mbokosi?
- Mba ninani woyo baYehoba basalulula ukuba umupapatilisi umukulu, kabili findo umupapatilisi acita?
- Fisimbule ifintu fitatu ifili mu cipinda icikulu ice tente.
- Nifisa fintu fibili ifili mu lubansa lwe sema, kabili filapyungisiwa kundo?
Ifyakwipusya na fimbi
- Pendeni Ifyakufuma 25:8-40; 26:1-37; 27:1-8; na 28:1.
Kani bakelubi abaali peulu ‘lya mbokosi ya kulayana’ balukwimakaninako indo? (Fum. 25:20, 22; Pen. 7:89; 2 Imf. 19:15)
- Pendeni Ifyakufuma 30:1-10, 17-21; 34:1, 2; na AbaEbeya 9:1-5.
Mba nindo baYehoba bakonkomesesye pa kucindama kwa kulilama abaswetele ku munefu ku bapapatilisi abalukupyunga pe sema, kabili ici cingatulenga ukuba syani muli bulelo? (Fum. 30:18-21; 40:30, 31; Ebeya. 10:22)
Kani intangisi Paulu alilangile syani ati Ifunde lya kulayana ne sema fyalisilile pa mpindi ili ye alembele imbaluba yakwe ku baKlistu abaEbeya? (Ebeya. 9:1, 9; 10:1)
