Chihande 37

Mbalaka Yakulemesela

UNWEYI zuvo unayijiva nyi? Yikiko mbalaka yakulipwila yakulemeselamo Yehova. Vayivuluka nawa ngwavo tavanaku. Vatu vayikumishile kuyitunga hakuhita chamwaka umwe kufuma hakulovoka muEjipitu. Nawijiva anehele vishinganyeka vyakutunga zuvo kaneyi tahi?

Vyapwile vishinganyeka vyaYehova. Omu Mose apwile haPili Shinai, Yehova amulwezele mwakuyitungila. Amulwezele ayitunge mujila yayashi kupapula. Ngachize vihanda kana vanahase kuya navyo kuchihela chikwavo, nakuvipata cheka. Shikaho vaIsalele hakunungwojoka mupambo, vayilenga neyi mbalaka.

Nge mutala mukapete kakandende kakusongo yambalaka, mumona chikasha. Vachivuluka ngwavo chikasha chalushiko. Vatungilileho vangelo vavali chipwe ngwetu vakeluve vaulu, umwe kusali mukwavo kusali. Kalunga asonekele cheka Jishimbi Likumi hamalolwa avali, mwomwo akulivanga Mose awapazwile. Malolwa awa vawalaminyinyine muchikasha chalushiko. Mukapete mwapwile namutumwa wamana. Mana muyanuka tahi?

Alone yaya yaMose, ikiye vanatongola kuli Yehova apwenga kapilishitu wakulitulaho. Anakutwaminyina vatu mukulemesa Yehova. Navana venyi nawa hivapilishitu.

Tala nawa mukapete kakanene mumbalaka. Mukutohwa kanazomboka kapete kakandende mapapa kavali. Wachimono chikasha chinakukakumuka wishi tahi? Likiko lijiko haze vapilishitu veji kulumbanga vyuma vyalivumba lyamwaza. Muli nachitumbikilo chamanongo chili namanongo atanu naavali. Chuma chamuchitatu mukapete kano shina mesa. Hakiko valamina jimbolo 12.

Muchipango chatavanaku muli chiloso, chipwe mbashiya, yato yameya. Awa himeya akusana vapilishitu. Muli nalijiko lyakulumbila lyalinene. Hakiko hakulumbila vimuna vakuvatula kupwa wana kuli Yehova. Mbalaka yili mukachi kachilombo, yakujingilika kujimbalaka javana vaIsalele.

Kulovoka 25:8-40; 26:1-37; 27:1-8; 28:1; 30:1-10, 17-21; 34:1, 2; WavaHepeleu 9:1-5.