Ekitebyo 37

Eihema ry’Okuramizamu

NOOMANYA ekyombeko eki? N’eihema ry’omutaano ery’okuramizamu Yehova. Nikyetwa Eihema ry’okubugabuganiramu. Abantu bakamara kuryombeka bwanyima y’omwaka gumwe baherize kuruga omuri Misri. Noomanya owaaretsire ekiteekateeko ky’okuryombeka?

Kikaba kiri ekiteekateeko kya Yehova. Obu Musa yaabaire ari ahaiguru aha Rushozi Sinai, Yehova akamugambira kuryombeka. Akamugambira kurikora kugira ngu ribaase kupangururwa jubajuba. Omu muringo ogwo, ebicweka byaryo bikaba nibibaasa kutwarwa okuza omu mwanya ogundi kandi bikashuba bikakwatanisibwa. N’ahabw’ekyo Abaisraeli ku baabaire baruga omu mwanya gumwe kuza omu gundi, bakaba beekorera eihema eryo bagyenda naryo.

Waareeba omu kashengye akakye akari aha muheru gw’eihema, nooreebaho eshanduuko. Egi neeyetwa eshanduuko y’endagaano. Ekaba eine ebishushani bibiri bya baamaraika nari baakerubi bikozirwe omuri zaabu, omwe ahari buri rubaju. Ruhanga yaagaruka yaahandiika Ebiragiro Ikumi aha bishate bibiri by’amabaare, ahabw’okuba Musa akaba aherize kwatagura eby’okubanza. Kandi ebi bishate by’amabaare bikaba nibibiikwa omu shanduuko y’endagaano. Kandi, orwabya rw’emaanu rukaba rutuura rubiikirwe omunda yaayo. Noijuka emaanu n’eki?

Mukuru wa Musa Arooni niwe Yehova atooraine kuba omunyamurwa omukuru. Nayebembera abantu omu kuramya Yehova. Kandi abatabani nabo n’abanyamurwa.

Hati reeba ekishengye ekihango eky’eihema. Nikihango emirundi ebiri kukira akashengye akakye. Nooreeba eshanduuko nari akashanduuko akakye, akarikurugwamu omwika? Eri n’itambiro au abanyamurwa barikwokyeza obubaane oburikutaamirana oburikwetwa emigaju. Kandi hariho ebikondo by’etabaaza ebiriho etabaaza mushanju. Ekintu kya kashatu ekiri omu kishengye n’emeeza. Aha meeza, hariho emigaati ikumi n’ebiri.

Omu kibuga ky’eihema harimu ekaraaya mpango, nari shi ebaafu, eijwire amaizi. Abanyamurwa nibagikoresa kunaaba. Kandi harimu eitambiro rihango. Aha itambiro eri, enyamaishwa ezitsirwe nizokibwaho nk’ekitambo ahari Yehova. Eihema riri ahagati y’orusiisira, kandi Abaisraeli nibatuura omu mahema agaryetoroire.

Okuruga 25:8-40; 26:1-37; 27:1-8; 28:1; 30:1-10, 17-21; 34:1, 2; Abaheburaayo 9:1-5.