¿TE RÄ me̱ꞌä nuni hutsꞌi ha rä kꞌoi? Nꞌa rä däta nguu xa mähotho pa drä xo̱kämbeni Jeoba. Tꞌembi rä tabernäkulo. Mꞌe̱fa de xki bo̱ni de Ejipto, bi zitsꞌi se̱he̱ nꞌa nje̱ya pa yä israelita bi uadi bi hyoki nunä rä nguu. ¿Gi pädi toꞌo bi mända dä thoki?

Go bi mända Jeoba. Nuꞌmu̱ rä Moises mi yꞌo ha rä ndehe rä tꞌo̱ho̱ Sinäi, Jeoba bi xipi hanja dä hyoki näꞌä rä tabernäkulo. Bi xipi hanja xä hyoki pa njabu̱ xä za xä hñätsꞌi habu̱ xä ma. ꞌNe habu̱ xä zo̱ni, xä za xä ꞌñegi mänꞌaki näꞌä rä tabernäkulo. Hänge nuꞌmu̱ bi ñꞌo ha yä yꞌotꞌä hai, nuꞌu̱ yä israelita bi hñätsꞌi rä tabernäkulo ha gatꞌho bi ma.

Mu̱ gi hyandi nuni rä tꞌu̱kä kuarto ja ha rä tabernäkulo, dä za gi hyandi nꞌa rä zi kaha. Nunä rä zi kaha mi tꞌembi rä kaha de gä kohi. Ha rä njoꞌmi, mi ja yoho yä e̱nxe̱ o yä kerubin de gä oro nuꞌu̱ xki ñhandi. Äjuä bi yꞌofo mänꞌaki ha yoho yä nxindo nuꞌu̱ Rꞌe̱tꞌa yä Mhända, ngeꞌä rä Moises xki tehmi nuꞌu̱ ri mu̱di yä nxindo. ꞌNe nuyu̱ yä nxindo bi ꞌme̱ꞌtsi ha näꞌä rä kaha de gä kohi. ꞌNehe ja bi ꞌme̱ꞌtsini nꞌa ꞌmada rä mänä. ¿Gi beni te rä me̱ꞌä rä mänä?

Jeoba bi huahni rä Aron, rä ku rä Moises pa go geꞌä rä däta majhä. Rä Aron go geꞌä bi gu̱tꞌi rä ꞌñuu pa yä israelita bi xo̱kämbeni Jeoba. Nuꞌu̱ yä tꞌu̱ rä Aron mñä majhä ꞌnehe.

Nubye̱ hyandi näꞌä rä däta kuarto ja ha rä nguu. Nuni mi yo mꞌiki mrä däta ke näꞌä rä tꞌu̱kä kuarto. ¿Gi handi nꞌa rä zi tꞌu̱kä kaha habu̱ po̱ni rä ꞌmifi? Gehni tꞌembi rä altar habu̱ yä majhä mi tsätꞌi rä tꞌutsꞌi. Nuni mi yu̱ni xä ku̱hi. Hyandi ꞌnehe nuni rä mfox-yoo pe̱ꞌtsi yoto yä ñotꞌi. ¿Dä za gi hyandi habu̱ tidi ꞌnehe nꞌa rä mexa? Ja tꞌexhni 12 yä thuhme.

Ha rä patio rä tabernäkulo ja nꞌa rä däta palanganä ñuxä rä dehe. Ja gehni mi xu̱ki yä yꞌe̱ ꞌne yä ua yä majhä. ꞌNehe ja xä thokini näꞌä rä däta altar. Ja gehni mi tsꞌätꞌi nuꞌu̱ yä zuꞌue ya xki tho pa rä ofrenda Jeoba. Rä tabernäkulo mi tidi mädetho de näꞌä rä ꞌmatha habu̱ xki hyoki yä nguu de gä dutu yä israelita.