WASWE, iu savve wanem nao disfala building? Hem wanfala spesol tent for worshipim Jehovah. Olketa kolem hem tabernacle. Olketa pipol wakem insaed long wanfala year bihaen olketa lusim Egypt. Waswe, iu savve hu nao givim idea for buildim diswan?

Hem idea bilong Jehovah. Taem Moses hem antap long Maunt Siʹnai, Jehovah talem hem hao for wakem datwan. Hem sei for mekem diswan long wei wea hem bae isi for tekaotem. Then hem bae isi for karem olketa difren part bilong hem go long narafala ples, and then joinim tugeta moa. So taem olketa Israelite muv from wanfala ples go long narafala ples long wilderness, olketa karem tent hia witim olketa.

Sapos iu luk insaed long smolfala rum long end bilong disfala tent, iu savve lukim wanfala box. Diswan hem ark bilong covenant. Hem garem tufala angel or cherub wea olketa wakem from gold, long each saed bilong hem. God raetem moa Ten Komandment long tufala flat ston, bikos Moses hem brekem tufala first wan. And olketa ston hia stap insaed long ark bilong covenant. And tu, olketa putim wanfala botol manna insaed. Waswe, iu rememberim wanem nao manna?

Brata bilong Moses, Aaron, hem nao man wea Jehovah chusim for hae priest. Hem leadim olketa pipol for worshipim Jehovah. And olketa son bilong hem olketa priest tu.

Lukluk distaem long bigfala rum bilong tent hia. Hem tu-taems moa big winim datfala smol rum. Waswe, iu lukim box wea smoke go ap from hem? Diswan nao hem altar wea olketa priest olketa bonem samting wea smel naes wea olketa kolem incense. Wanfala lampstand wea garem sevenfala lamp tu hem stap. And mek-thri samting insaed long rum hem wanfala tebol. Olketa putim 12-fala bred long hem.

Long area aotsaed long tabernacle wanfala bigfala dish, or basin hem stap wea fulap witim wata. Olketa priest iusim diswan for waswas. Wanfala bigfala altar tu stap. Antap long diswan olketa bonem olketa animal wea dae finis olsem sakrifaes long Jehovah. Tent hia hem stap long midol bilong camp, and olketa Israelite stap long olketa tent raonem diswan.