37 yachachiy

Yupaychanapaq toldo

¿YACHANKICHU imapaqchus kay wasi? Kay toldo wasiqa Jehovata yupaychanapaq. Tantakunapaq toldo sutikun. Egiptomanta lluqsisqankumanta, tukuy llaqta juk watapi ruwayta tukucharqanku. ¿Pitaq kayta ruwanankuta nirqa?

Jehová chayta kamachirqa. Moisés Sinaí urqupi kachkaptin, imaynatachus ruwakunanta nirqa. Diosqa toldota apaykachayta atikunanpaqjina ruwakunanta nirqa, jinamanta chay muyuriyninpi tantakunankupaq. Chayrayku israelitakuna kuyuriptinku toldota apakapuq kanku.

Toldopi juchʼuy cuartituta qhawanki chayqa, juk cajata rikunki. Chay cajaqa, Diospa trato ruwasqan arca sutichakun. Patanpi qurimanta iskay querubín angelkunayuq karqa. Moisés chay rumikunata phirisqanrayku Diosninchik watiqmanta iskay rumipi Chunka Kamachiyninta qillqarqa. Chay musuq rumikunatataq chay arcapi jallchʼarqanku. Chantapis juk chuwata maná nisqamanta arca ukhupi jallchʼarqanku. ¿Yuyarinkichu imachus maná kasqanta?

Jehová Aaronta, Moisespa wawqinta, sacerdotespa kuraqnin kananpaq akllarqa. Pay llaqtata umachan Jehovata yupaychanankupaq.

Kunanqa toldomanta aswan jatun cuartituta qhaway. Kayqa iskay juchʼuy cuartitujina. ¿Rikunkichu maymantachus qʼusñi lluqsimusqanta? Chayqa inciensota qʼusñichinapaq altar. Inciensoqa sumaqta qʼapan. Chantapis qanchis palqasniyuq qurimanta kʼanchachinata qhawariy. Astawanpis chay cuartupiqa juk mesa tiyan, patanpitaq 12 tʼanta tiyan.

Tinkukuna toldop pationpiqa juk jatun cobremanta chʼillami yakuyuq tiyan. Sacerdotekunaqa chaypi mayllakunku. Chantapis patiopi jatun altar tiyan. Chaypi Jehovata yupaychanapaq wañusqa uywakunata qʼulachikun. Kay toldoqa llaqtamanta chawpipi chachkarqa, israelitakunataq muyuriyninpi tiyakuq kanku.

Éxodo 25:8-40; 26:1-37; 27:1-8; 28:1; 30:1-10, 17-21; 34:1, 2; Hebreos 9:1-5.