ÚFA kwagh u imaagh kin ki lu kpa? Ka icighan tenti sha ci u civir Yehova. Mba yer un kpaa er tabernakel. Ior mbara yange ve bee u maan un er yange ve due ken Igipiti inyom i kar i môm yô. Ú fa or u yange nan na mhen sha u i maa un kpa?

Yange lu mhen u Yehova. Ka shighe u Mose lu sha Uwo u Senai la, Yehova ôr un sha e̱r una maa un ye. Yange kaa er i̱ maa un sha er a fatyô u hiden saghen un fese yô. Sha gbenda ne yô a fatyô u tôôn avegher a na yemen a min hen ijiir i genegh, man shi hen ijiir la kpaa shi a za hide a kohol her. Nahan er yange Mbaiserael ve lu zenden yemen ajiir kposo kposo ken taaikyôngo yô, ve tôôn tenti la ve zenden a mi.

Aluer ú nenge ken atô ken kpe u tenti la yô, ú fatyô u nengen a akwati, shin gber. Mba yer un er areki u ikuryan. Yange lu a mbatyomov uhar shin ucerubi mba sha zenaria, môm ken kur u ngun môm di ken kur u ngura. Aôndo shi hide nger Atindiakaa a Pue la sha awen a lun ipe ahar, sha ci u Mose vande hemben a hiihii la. Man awen ne yange i ver á ken atô u areki u ikuryan la. Shi, gber u mana kpa yange i ver keregh. Ú umbur kwagh u á lu mana kpa?

Ka Aron anngô u Mose la Yehova a tsough er a̱ lu pristi u tamen ye. Ka a hemen ior ken mcivir u Yehova. Shi ônov nav mbanomso kpaa ka upristi.

Hegen yô nenge ase ken atô u kpar u vesen u tenti la. A gbanger a hemba anyou u kiriki la kwa har. Ú nenge a akwati, shin angber la, a mnyim ma má lu duen shimi la kpa? Ngun ka atse hen ape upristi ka ve nande nagh ku i yer er kwaghhumandoon u nanden nagh je la. Nahan shi daarimenger ngu u a lu a amenger ataankarahar yô. Shi kwagh u sha utar u a lu ken kpar la yô ka tebul. I penda ikpen i bredi 12 shami.

Ken tembe u tabernakel la zege tasa, shin gbanyi, ngu heregh, u i iv un a mngerem yô. Upristi ka ve ôôn ave shimi. Shi atse a vesen kpa nga. Heen ne ka i nande nagh ku inyam i i woo la sha ci u Yehova. Tenti ne ngu hen atô u afo la jighjigh, man Mbaiserael di mba ken utenti vev kase ningir un.