¿YABAL anaʼ bin-a te mukʼul na ini? Jaʼ jun nailpakʼ te yan yilel-ae te banti la yichʼ ichʼel ta mukʼ te Jehovae. La sbiilin Nailpakʼ templo. Jaʼ ini ta junax jaʼbil la spasik te israeletik te kʼalal lokʼemikix tal ta Egipto-ae. ¿Yabal anaʼ machʼa-a te la yakʼ ta pasele?

Jaʼ te Jehovae. Te kʼalal ayto ta wits Sinaí-a te Moisese, albot yuʼun Jehová te bin utʼil ya yichʼ pasele sok albot yuʼun te yakuk xjuʼ ta kolel ta oranaxe. Yuʼunme jich ya xjuʼ ta ichʼel bael ta bayuknax, sok jich ya yichʼ tsʼakel ta yan buelta. Jaʼ yuʼun te kʼalal bajtʼik ta nainel ta bayuknax te israeletik ta jochol takin kʼinal, la skuchik bael te nailpakʼe.

Teme ya awil te tut kuarto te ay ta nailpakʼe, ta yutil ya xjuʼ ya ata ta ilel te ay jun kaxa tey-ae. Te kaxa ini sbiilinej skaxaul te chapbil kʼope. Ay cheb chʼul abatetik o querubinetik tey-a te pasbilik ta oro, te ayik ta jujunjejch. Te Dios la schaʼtsʼibay te Lajuneb Mantaliletik ta chaʼpejch ton, melel te sbabial chaʼpejch ton la stopʼ te Moisese. Te chaʼpejch ton te la xchaʼyichʼ pasele la yichʼ kʼejel ta skaxaul te chapbil kʼope. Jaʼnix jich la yichʼ kʼejel maná ta jun jarra tey-a. ¿Yatobal anaʼ bin-a te maná?

Te Jehová la stsa te Aarón te sbankil Moisés yuʼun jaʼ ya x-och ta sacerdote. Jaʼ la swol te israeletik ta yichʼel ta mukʼ te Jehovae. Jaʼnix jich ochik ta sacerdoteetik euk te snichʼnabe.

Ta ora ini, ilawil te mukʼul kuarto yuʼun te nailpakʼe. Jaʼ kʼax mukʼxan yuʼun te yan tut kuartoe. ¿Yabal awil te tut kaxa te banti yak ta lokʼel te chʼaile? Jaʼme skajtijib te banti ya schikʼik pom te sacerdoteetik te bujtsʼanax yikʼe. Ilawil te skajtijib kʼajkʼ te yichʼoj jukeb yawil kʼajkʼetik tey-ae. Te yoxebal te bin ay ta kuartoe jaʼ jun mesa te banti aynanix lajchayeb panetik-ae.

Ta yamakʼul te Nailpakʼ temploe, ay mukʼ yawil jaʼ tey-a te nojel ta jaʼe. Te sacerdoteetik ya stuuntesik ta swenta spokel yok skʼabik. Soknix tey ay-a te mukʼul skajtijib chikʼbil majtʼanile. Tey ya yichʼ chikʼel-a te milbil chambalametik swenta smajtʼan te Jehovae. Te Nailpakʼ templo ay ta yolil te campamentoe. Te israeletik ayik ta nainel ta snailpakʼik ta sjoyobal te Nailpakʼ temploe.