Ni a ḓivha uri itshi tshifhaṱo ndi mini? Ndi dennde yo khetheaho ya u rabela Yehova. I dovha ya vhidzwa dennde ya mulanga. Vhathu vho fhedza u i fhaṱa ho no vha ṅwaha muthihi vho ṱuwa Egipita. Ni a ḓivha uri wo vha u muhumbulo wa nnyi wa u i fhaṱa?

Wo vha u muhumbulo wa Yehova. Musi Mushe e nṱha ha Thavha ya Sinai, Yehova o mu vhudza uri a i fhaṱe hani. O ri a i ite lune ya nga thuthiwa ya vha zwipiḓa. Nga iyo nḓila zwipiḓa zwo vha zwi tshi nga hwalelwa kha huṅwe fhethu, zwa dovha zwa ṱanganywa henengei. Ngauralo musi Vhaisiraele vha tshi bva huṅwe fhethu vha tshi ya huṅwe sogani, vho ṱuwa na dennde.

Arali na sedza ngomu kamarani ṱhukhu vhufheloni ha dennde, ni nga vhona bogisi. Iḽi ḽi vhidzwa mbulungelo ya mulanga. Yo vha i na vharuṅwa vhavhili kana vhakerube vha musuku, kha thungo mbili. Mudzimu o vha o dovha a ṅwala Milayo ya Fumi kha mbaba mbili dza matombo, ngauri Mushe o vha o pwasha dza u thoma. Nahone matombo ayo a vhewa mbulungeloni ya mulanga. Na mudzio wa mana wa vhewa ngomu hayo. Ni a humbula uri mana ndi mini?

Aroni mukomana wa Mushe o vha e ene we Yehova a mu nanga uri a vhe tshifhe muhulu. O vha a tshi ranga vhathu phanḓa kha u rabela Yehova. Na vharwa vhawe na vhone vho vha vhe vhotshifhe.

Zwino sedzani kamara khulwane ya dennde. Yo hula kavhili u fhira kamara ṱhukhu. Ni khou ḽi vhona bogisi, ḽine ḽa khou bva mutsi? Ndi aletare he vhotshifhe vha vha vha tshi fhisa zwithu zwi nukhelelaho zwi vhidzwaho zwioro. Ho vha hu na tshiṱomambone tsha mbone dza sumbe. Tshithu tsha vhuraru yo vha i ṱafula. Khayo ho vha ho vhewa lofo dza 12 dza vhurotho.

Muṱani wa dennde ya mulanga ho vha hu na ndishi khulu, yo ḓalaho maḓi. Vhotshifhe vho a shumisa u ṱamba. Ha dovha ha vha na aletare khulu. Afho ho vha hu tshi fhiswa zwipuka zwo faho sa tshiṱhavhelo kha Yehova. Dennde yo vha i vhukati ha mushasha, nahone Vhaisiraele vha tshi dzula dzidenndeni dzavho u i mona.

Ekisodo 25:8-40; 26:1-37; 27:1-8; 28:1; 30:1-10, 17-21; 34:1, 2; Vhaheberu 9:1-5.