Tantara 37

Tran̈olay Fan̈anaovan̈a Fanompoan̈a

TRAN̈O nino io koa hainao? Izio tran̈olay fan̈anaovan̈a fanompoan̈a Jehovah fo. Tabernakely koa ikahian̈a izio. Taon̈o araiky nialan-drô Israelita aby io ta Ejipta nahavitan-drô izio. Azôvy nan̈iraka irô nan̈amboatra izio koa hainao?

Jehovah. Tamy Mosesy tan̈abon’ny Bongo Sinay tan̈y in̈y, Jehovah nan̈iraka izy nan̈amboatra izio. Nirahiny atao mety asaratsaraka izio. Amy zen̈y izy mety indesin̈y, baka iô atambatra. Ke Israelita aby io koa fa nifindrafindra tamy tany paiky tan̈y, tran̈olay io nindesin-drô man̈araka irô.

An̈atin’ny tran̈ohely, amy farany irỳ, anao mahita raha karaha boaty zay. Fiaran’ny fanekena ikahian̈a izio. Misy sarin’anjely na kerobima volamena aroe an̈ilan̈ilan’izio. Zan̈ahary nimpody nanoratra Didy Folo tamy vato fisaka aroe, fôtony araiky taloha in̈y fa nivakin’i Mosesy in̈y. Ke vato fisaka aroe vaovao io nikajin̈y tan̈aty fiaran’ny fanekena tao. Tan̈atin’izio tao koa nikajin̈a sajoa nisy mana. Azonao onon̈o ino mana zen̈y?

Jehovah nifidy Arona, rahalahin’i Mosesy atao mpisôron̈obe. Izy mitariky, lera man̈ano fanompoan̈a Jehovah. Zanany lelahy jiaby koa mpisôron̈o.

Zahava amy zay an̈aty trano araiky bebe io. Indroen’araiky hely in̈y habezan’izio. Hitanao kesiky hely, misy setroko manonga io? Izio talatala. Tiô mpisôron̈o aby io nan̈ôro emboko man̈itry. Nisy fipitrahan’ny jiro koa tao. Fito jiro napetraka tamy zio. Baka iô nisy latabatra koa tao, ke tan̈abon’izio nikajin̈y môfo 12.

Ambelan̈a tabernakely io, misy kovety be feno rano. Iô irô mpisôron̈o aby io manasa ain̈y. Misy koa talatala maventy. An̈abon’izio iroan̈a biby atao sôron̈o amian̈a Jehovah. Tan̈ivon’ny toby nan̈apitrahan̈a tabernakely io. Tran̈olain-drô Israelita aby io amy zay mikodidin̈y izio.

Eksodosy 25:8-40; 26:1-37; 27:1-8; 28:1; 30:1-10, 17-21; 34:1, 2; Hebreo 9:1-5.