ANA akumanyilila kuti cinyumbaci cili cici? Cili tenti japajika jakulambilila Yehofa. Ŵandu ŵamalisisye kutaŵa tentiji pali papite caka cimo cikopocele ku Eguputo. Ana akumanyilila kuti syaliji nganisyo sya nduni kuti ataŵe tentiji?

Syaliji nganisyo sya Yehofa. Musa paŵaliji pacanya pa Litumbi lya Sinayi, Yehofa ŵamsalile kataŵe kakwe. Ŵamsalile kuti ajitaŵe mwati mpaka jikomboleceje kujigopola mbali syakulekanganalekangana. Kataŵeka kaliji kakamucisya kuti akomboleje kujinyakula mbali syakulekanganalekanganasyo pakusamila malo gane, kuti kweleko akajitaŵesoni kaŵili. M’yoyo Ayisalayeli paŵasamilaga malo gakulekanganalekangana mwipululu, ŵanyakulaga tenti jakulambililajo.

Naga akulola mkati mwa kacipinda kamwana cakumbesi kwa tentijo, komboleka kuliwona libokosi. Libokosili ŵalikolangaga kuti libokosi lya cilangano. Lyakwete malayika gaŵili kapena kuti akelubi ŵaŵapanganyisye ni golidi, jwine ŵaliji mbali jine, jwine mbali jinesoni. Mlungu ŵalembilesoni Malamusi Likumi pa mapale gaŵili ga maganga, ligongo Musa ŵaliji ali akasile mapale gandanda gala. Magangaga ŵagasungagasoni mkati mwa libokosi lya cilangano. Nambosoni, mlulo wa mana ŵawusungaga mwelemu. Ana akukumbucila kuti mana ni cici?

Yehofa akumsagula Aloni mkulugwe Musa kuŵa jwambopesi jwamkulungwa. Jwalakwe akwalongolela ŵandu pakulambila Yehofa. Ŵanace ŵakwe ŵalijisoni ŵambopesi.

Sambano alole cipinda cekulungwa ca tentijo. Cili cekulungwa kuwilisya kaŵili pakuwanicisya ni cipinda camwanaco. Ana akuliwona libokosi, soni ana akuliwona lyosi lyalikopoka kutyocela pa libokosipo? Gelega gali masabawu. Pelepa ŵambopesi akusajocelapo yindu yine yakununjila cenene yakolanjikwa kuti ubani. M’cipinda cekulungwaco mwanasoni cakuŵikapo nyali cacikwete nyali 7. Cindu catatu m’cipindaco cili tebulo. Pa tebulopo akusasungapo mikate 12.

Pa luŵala lwa tentijo pana libeseni lyekulungwa lya mesi. Ŵambopesi akusalikamulicisya masengo pakunaŵa m’miyala ni mu sajo mwawo. Panasoni masabawu gekulungwa. Pa masabawupo yinyama yewe akuyijoca kuŵa mbopesi kwa Yehofa. Tenti jakulambililaji jili pasikati pasyesyene pa matenti ga Ayisalayeli, soni Ayisalayeliŵa akutama mwakusungulila tenti jakulambililaji.