AKAN muxsa achunak kallnaqasipki, uk uñtma. Uka uwasax wali jachʼawa. Paniniw kalltapxi. Higosa granadasa utjarakiwa. ¿Kawkits apanipxi? Canaanatwa apanipxi. Amtañäni, Abrahamasa, Isaacasa, Jacobusa Canaán uraqinwa nayrax jakasipxäna. Machʼa utjxäna ukhaw Egiptor Jacobux familiapampi sarxapxäna. Niya 216 maraw pasxäna, ukat wasitampiw Canaanar Moisesax israelitanak irpanxäna. Cades sat wasararuwa puripxäna.

Canaananxa jan wali jaqinakaw jakapxäna. Ukatwa Moisesax tunkapayan uñaqirinak akham sas khitäna: ‘Qhawqhanis ukan jakapxi, ukat ukan jakir jaqinakaxa chʼaman jaqinakati janicha uk uñjanipxäta. Ukhamaraki uraqix sum achuriti janicha ukanaka. Ukat achunak apanipxarakïtawa’ sasa.

Ukat uñaqanakax Cadesar kuttʼanxapxäna ukhaxa, Moisesar akham sapxänwa: ‘Chiqpachansa uka uraqix wali sumawa’ sasa. Ukat chiqaw sapxañapatakix muxsa achunakwa uñachtʼayapxäna. Ukampis tunkanix akham sapxänwa: ‘Ukan jakir jaqinakax wali chʼaman jachʼa jaqinakawa. Uraq aparañ yantʼañänixa jiwarayapxistaniwa’ sasa.

Uk istʼasax wal sustjasipxäna. ‘Egiptonsa jiwaraskasäna jan ukax aka wasaransa. Jichhax aka nuwasïwin jiwarañäni, warminakasas wawanakasas katuntatäpxaniwa’ sasaw sapxäna. ‘¡Moisés lanti mä jilïr uttʼayasiñäni, ukat Egiptor kuttʼxapxañäni!’ sapxänwa.

Ukat Josué, Caleb sat tatanakax Jehová Diosaruw atinisipxäna. Ukat jan ukham parlapxañapatakix akham sapxänwa: ‘Jan axsarapxamti. Jehová Diosax jiwasampiwa. Janiw chʼamäkanit uka uraqir mantañaxa’ sasa. Ukat janiw istʼapkänti. Antisansa Josué ukat Caleb tatanakaruw jiwayañ munapxäna.

Uk uñjasax Jehová Diosax wal colertʼasïna, ukatwa Moisesarux akham säna: ‘20 maranit jila maraninakaxa janiw khitis Canaanar mantkaniti. Egiptot apsuniñatak walja milagronak lurta ukanak uñjkasas janiw jichhakamas atinisipkituti. Jichhax 40 maraw aka wasaran uka jaqinak jiwañapkam sarnaqapxani. Josué ukat Caleb tatanakakiw Canaán uraqir mantapxani’ sasa.